Bohol BFP miduso P137-M 

nga papundohan sa 2022

TAGBILARAN CITY, Bohol, April 13 (PIA) -- Kon dili madiskaril ang laraw ug kapundohan sa nasudnong kagamhanan, kinatibuk-an nga P137,322,000 ang pamuhunan sa sa kagamhanan nagdto sa mga bomberohan sa Bureau of Fire Protection (BFP) dinhi sa Bohol alang sa 2022.

Kini maoy gibuyag ni FCInspector Raul Bustaliño, didto sa Kapihan sa PIA niadtong buwan sa Marso.

Labing daku nga pundo sa goberno alang sa sunod nga tuig nga gipangayo sa BFP mao ang P30,000,000 nga bag-ong Bohol Provincial Fire Marshal Office nga adto tukoron sa Cortes, lain nga P19,470,000,00 nga Tagbilaran City Fire Station sa Barangay San Isidro ug tag P7,321,000 nga fire stations sa Corella, Anda, Loboc, Bilar, Pilar, San Miguel, Duero, Getafe, Lila, Trinidad, Danao ug Balilihan. 

Sa laing bahin, gikataho ni Inspector Bustaliño nga sa Bohol, upat na lang ka kalungsuran ang wala pa makapatindog sa Buhatan sa Bureau of Fire.

Kining upat ka lungsod mao ang Duero, San Miguel, Danao, ug Lila.

Hinuon, dugang sa BFP Bohol, kining mga kalungsuran nga nahisgutan, pulos na naghatag sa ilang donasyon nga yuta nga katukoran sa mga Municipal Fire Stations ug nagpaabut na lang sa pundo gikan sa BFP aron makatukod nag kaugalingon nga bomberohan.

Sa kinatibuk-an nga 47 ka lungsod ug 1 ka syudad sa Bohol, 44 na ka kalungsuran ang may kaugalingon ga estasyonan sa mga tigpawong sa sunog.

Hinuon usab, mas nindot ang kahimtang sa Bohol kon itandi sa silingan nga lalawigan sa Sugbo: diin sa 52 ka kalungsuran, 44 pa lamang usad nii ka kalungsuran ang may Fire Stations ug may walo pa ka kalungsuran ang wala pay estasyonan sa kabomberohan.

Ang lalawigan sa Negros Oriental ug Siquijor hinuon, may komepto na nga mga kabomberohan sa ilang matag kalungsuran. (rahc/PIA-7/Bohol)

MAS DAKU NGA PUNDO ALANG SA BOHOL. Gipangayo sa BFP Bohol pinaagi ni Fire Chief Insp. Raul Bustaliño ngadto sa BFP ang kinatibuk-an nga P133 milyones nga pundo alang sa bag-ong mga estasyonan lakip na ang Bohol BFP Office, Tagbilaran CIty Fire Station ug estasyonan sa kalungsuran. (PIA Bohol)