Balitang nagka-mild stroke

si Duterte, fake news – PCOO

MANILA, April 8 (PIA)--Peke ang balitang gipakatap sa social media niadtong Miyerkoles nga nag-ingon nga nagka-mild heart attack si Presidente Rodrigo Roa Duterte.

Sa Facebook post ni Presidential Communications Operations Office (PCOO) Kalihim Martin Andanar, iyang gibutang ang screenshot sa post diin gipagawas nga murag news report kini nga may headline nga nakabutang nga “Breaking News: Sources say Duterte suffers Mild Heart Attack.”

“Huwag magpapaniwala sa FAKE NEWS,” matud pa ni Andanar isip caption sa maong post.

Sa gi-delete na karon nga post, ang Maharlika TV mibutang nga gikan sa kasaligang tinubdan ang nag-ingon nga ang public address ni Duterte gi-kanselar niadtong Miyerkoles, Abril 7 tungod kay ang 76 anyos nga Chief Executive nagka-mild stroke.

Kahinumdoman nga ang talk to the nation sa Presidente niadtong Lunes, Abril 5, gi-uswag niadtong Miyerkoles sa gabii.

Apan napugos na usab si Duterte og reschedule sa iyang public address human daghan sa mga miyembro sa Presidential Security Group (PSG) ang nag-positibo sa COVID-19.

Samtang sa laing Facebook post, gipaskil usab ni Senador Christopher Lawrence ‘Bong’ Go ang pipila ka hulagway ni Presidente Duterte sa Palasyo sa Malakanyang sa kaulohan aron ihimakak ang gipakatap nga pekeng balita sa social media.

“Sa mga may masasamang hangarin, ‘wag muna kayo mag celebrate! Nandito lang si Tatay Digong. Tambak ang trabaho,” matud pa sa post ni Go.

“Sana tulungan na lang natin ang ating mahal na Pangulo para malagpasan natin ang crisis na ito bilang magkaka-isang mamayanang Pilipino,” panawagan pa sa senador. (ecb/PIA7-Bohol)

Peke ang balitang gipakatap sa social media gikan sa nagpailang Maharlika TV niadtong Miyerkoles nga nag-ingon nga nagka-mild heart attack si Presidente Duterte. (PIA)