DOH nipasidaan batok sa mga nanghatag,

nag-endorsar sa paggamit sa Ivermectin

TAGBILARAN CITY, April 8 (PIA)--Nipasidaan ang Department of Health (DOH) batok sa mga nanghatag ug nag-endorsar sa paggamit sa Ivermectin.

Matud pa sa usa ka pahayag ni DOH Undersecretary Maria Rosario Vergeire, mahimong mag-atubang ang magbuhat niini og kaso nga paglapas sa Repulic Act 9711 o ang Food and Drug Administration Act of 2009.

Gidugang pa ni Vergeire nga ang mga nanghatag og Ivermectin paglapas sa balaod nga nagbawal sa distribusyon sa mga dili rehistradong tambal.

Gipasabot usab niini nga klaro nga nakalatid sa R.A. 9711 nga hugot nga gidili ang pag-manufacture, importasyon, eksportasyon, pagbaligya ug pag-endorsar sa paggamit og mga adulterated, misbranded, ug dili rehistradong tambal.

Ang mga mapamatud-ang molapas niini mahimong mapahantangan og napulo ka tuig nga pagkabilanggo ug may multa usab nga P50,000 hangtod lima ka milyong piso.

Kahinumdoman nga una nang nipasidaan ang Food and Drug Administration (FDA) kalabot sa pag inom sa nahisgotang tambal, tungod kay rehistrado lamang kini sa nasod isip veterinary medicine o tambal sa mga hayop. (ecb/PIA7-Bohol)