DepEd, may pahinumdom sa

pagpahigayon sa early registration

TAGBILARAN CITY, April 5 (PIA)--Nagpagawas ang Department of Education (DepEd) og mga ispesipikong mando sa mga tunghaan ug mga field offices niini sa pagpahigayon sa early registration ug uban pang may kalabotan nga buhaton.

Dungan kini sa paghatag og bili sa kaluwasan ug panglawas sa mga magtutudlo, mga estudyante ug mga kawani sa departamento.

Sa gipagawas nga memorandum sa DepEd, gipahinumdoman ang mga field office nga gamiton ang mga online platform ug mga drop box sa pagpahigayon sa remote early registration gikan Marso 26 hangtod April 30, 2021.

“Similar to the previous year, early registration forms will be available in barangay halls and other public spaces. An early registration drop-box will be made available for parents or guardians to collect and submit the forms in these identified places,” matud pa sa pahayag ni Undersecretary for Planning and Human Resource and Organizational Development Jesus Mateo.

Gitugotan lamang ang in-person early registration sa mga lugar nga gipaubos sa modified general community quarantine (MGCQ) basta masunod ang safety protocols.

Samtang awtorisado usab ang Schools Division Superintendent (SDS) nga magpatuman og full remote early registration bisan sa mga lugar nga gipaubos sa MGCQ depende sa kasamtangang risk assessment level sa lugar.

Matud pa nga ang mga ginikanan ug guardian lamang ang tugotang makig-transact sa mga tunghaan.

Giingong angay usab nga magbutang ang mga regional ug division office og hotlines alang sa technical assistance sa mga tunghaan kalabot sa mga polisiya ug uban pa.

Samtang, gi-awhag usab ang mga tunghaan nga magbutang og hotlines ug ihatag ang ilang opisyal nga contact details sa publiko alang sa pagtubag sa mga pangutana kalabot sa early registration.

Gipahinumdom usab sa DepEd sa mga tunghaan ang hugot nga pagpatuman sa cut-off age sa Kindergarten, ilabi na sa mga tunghaang magsugod sa school year sa Agosto, angay nga singko (5) anyos sa Agosto 31 ang tinun-an sa Kindergarten, ug ang extension period hangtod sa Oktubre 31 lamang.

Tuyo sa maong aktibidad nga masiguro nga makaparehistro ang mga motungha nga Kindergarten, Grades 1, 7, ug 11 sa mga pampublikong elementarya ug sekondaryang mga tunghaan alang sa sunod nga school year.

Samtang ang mga tinun-an sa Grades 2 hangtod 6, 8 hangtod 10, ug 12 gikonsidera na nga pre-registered ug dili na kinahanglan pang moapil sa early registration

Pinaagi niini, matabangan ang DepEd nga makapangandam sa posibleng atubangon nga isyu. (ecb/PIA7-Bohol)

Sa paghatag og bili sa panglawas ug kaluwasan sa mga magtutudlo, tinun-an ug mga kawani, nagpagawas ang DepEd og mga ispesipikong mando sa mga tunghaan ug mga field office sa pagpahigayon sa early registration ug uban pang may kalabotan nga buhaton. (DepEd)