CSC nipasidaan sa publiko batok

sa mga reviewers, review centers

TAGBILARAN CITY, April 5 (PIA)--Nipasidaan ang Civil Service Commission (CSC) sa publiko batok sa mga review centers o indibidwal o grupo nga nagtanyag og review classes ug reviewers alang sa Career Service Professional ug Sub-professional Examination (CSE).

Kini human namatikdan sa CSC ang mga reviewers alang sa career service examinations nga gitanyag ug gibaligya sa mga bookstores, social media, o online selling websites.

May mga pag-angkon usab nga ang mga reviewers gihimo sa mga CSE topnotchers.

Subling gitambagan ang publiko sa CSC nga wala sila nagpahigayon og bisan unsang review classes, ni nagmantala o nangapod-apod og bisan unsang review materials alang sa Career ug bisan unsang Civil Service examinations.

Gawas pa niini, ang CSC wala nag-accredit ug bisan unsang review center alang sa tumong nga pagtanyag ug pagpahigayon og review classes ngadto sa mga umaabot nga career service examinees.

“May we advise again the public that the CSC neither holds any review classes nor publishes or distributes any review materials for the Career and any Civil Service examinations. Further, the CSC does not accredit and has not accredited any review center for the purpose of offering and holding review classes to prospective career service examinees,” matud pa sa gipagawas nga pahayag sa CSC.

Gidugang usab niini nga ang paggamit sa maong mga produkto ug serbisyo risgo na sa mopahimos niini.

Gawas pa niini, giklaro sa CSC nga wala sila nihatag og pagtugot sa bisan kinsang indibidwal o entidad sa paggamit sa ilang logo sa mga review materials. Wala usab sila namaligya og reviewers o nagpahigayon og review classes, o nihatag og pagtugot ngadto sa bisan kinsang personahe o entidad sa paghimo niining mga buhat.

Nipasidaan ang komisyon nga ang mga mogamit sa CSC logo nga walay awtoridad, apil na ang mga review centers nga nagtanyag og review classes aron mokita o bisan unsang tuyo, mahimong ipaubos sa criminal prosekusyon ubos sa magamit nga mga balaod. (ecb/PIA7-Bohol)

Subling nipasidaan ang CSC sa publiko nga wala sila nagpahigayon og bisan unsang review classes, ni nagmantala o nangapod-apod og bisan unsang review materials alang sa Career ug bisan unsang Civil Service examinations. (CSC)