DOH nipasidaan sa paggamit sa mga di

rehistradong tambal sama sa ‘ivermectin’

 

TAGBILARAN CITY, April 6 (PIA)--Nipasidaan ang Department of Health (DOH) sa publiko nga delikado ang paggamit og mga tambal nga dili rehistrado.

 

Kini ang gipagawas nga pahayag sa DOH taliwala sa pagmagahi ni Anakalusugan Party-list Rep. Mike Defensor sa plano niining mangapod-apod og libreng ivermectin drug.

 

“Gusto natin bigyan ng babala ang ating mga kababayan ang mga unregistered drugs po ay hindi masisiguro ng ating gobyerno na ito ay ligtas at maproprotektahan sila dito sa sakit na sinasabi natin na paggagamitan nito,” matud pa ni Undersecretary Maria Rosario Vergeire.

 

Kahinumdoman nga nipagawas og pahayad si Defensor nga nagtuo siyang luwas ug posibleng epektibo batok sa COVID-19 ang ivermectin tungod kay siya mismo giingong nigamit niini niadtong naigo siya sa coronavirus.

 

Apan matud pa sa World Health Organization (WHO) ug European Medicines Agency, wala pa’y igong ebidensya aron makaingon nga epektibo batok sa COVID-19 ang nahisgotang tambal.

 

“We recommend not to use ivermectin in patients with COVID-19 except in the context of a clinical trial,” matud pa sa gipagawas nga pahayag sa WHO.

 

Samtang matud pa ni Vergeire, kuyaw ang “false sense of security” nga posibleng kuptan sa mga Pilipino sa paggamit sa ivermectin.

 

Giingong gi-imbestigahan na sa Food and Drug Administration (FDA) ang posibleng silot kang Defensor.

 

Matud pa nga may bag-ong review na usab ang gihimo ang panel sa mga local experts human nagpulong ang mga ahensya ug proponent sa ivermectin niadtong milabay nga semana.

 

Ang ivermectin usa  ka orihinal nga tambal isip pampurga sa mga binuhing hayop.

 

Una na usab nga niingon ang FDA nga topical cream lamang o panghaplas sa panit ang rehistradong ivermectin sa Pilipinas nga alang sa tawo. Ang mga rehistradong ivermectin nga tableta o tambal alang lamang sa mga hayop. (ecb/PIA7-Bohol)