Sakripisyo sa mga medical frontliners, giila ni PRRD

dungan sa pagsaulog sa Kadaugan sa Mactan

TAGBILARAN CITY, April 27 (PIA)--Dungan sa pagsaulog sa Kadaugan sa Mactan sa pagpanguna sa kaisog ni Lapu-Lapu, gi-ila usab ni Presidente Rodrigo Roa Duterte ang mga medical frontliner, nga matud pa adlaw-adlaw nga nagsagubang sa pandemya.

Matud pa ni Duterte nga kun gihinumdoman man karon ang gipakita nga kaisog sa bayani nga si Lapu-Lapu, angay usab nga dungan nga hinumdoman ang gisagubang nga kakuyaw sa mga health worker.

Giingong gisugal nila ang ilang kinabuhi, aron lang masiguro ang kaluwasan sa mga kaubang Pilipino, taliwala sa peligrong dala sa COVID-19.

“Today, we remember their gallantry by honoring the worthy heirs of Lapu-Lapu’s legacy. Our medical and essential frontliners who in face of danger caused by Covid-19 pandemic continue to risk their lives, their own lives to ensure for the safety of their fellow Filipinos,” pahayag pa ni Duterte.

“Let us draw inspiration from the heroes of the past and present as we overcome pandemic and rebuild a stronger and more resilient nation,” dugang pa sa Pangulo.

Panawagan pa sa Presidente ngadto sa publiko, mokuha og inspirasyon sa mga nangagi ug kasamtangang bayani taliwala sa ginahimong pagsagubang karon sa pandemya, hangtod sa makabangon og balik ang nasod.

Nanghinaot ang Presidente nga mahimong mahinongdanon ang pagtimaan sa nahimong kalamposan sa Mactan, sa pagpanguna matud pa sa iyang idolo nga si Lapu-Lapu.

“I wish everyone a meaningful commemoration. Mabuhay ang sambayanang Pilipino. Mabuhay ang idol kong si Lapu-Lapu,” pahayag pa ni Duterte. (ecb/PIA7-Bohol)

Mensahe ni Presidente Rodrigo Roa Duterte atol sa ika-500 ka tuig nga selebrasyon sa Kadaugan sa Mactan, Abril 27, 2021. (PIA-Region7)