Bisan way ultra cold freezer, Bohol

pwede modawat sa Pfizer vaccines

TAGBILARAN CITY, Bohol, May 17 (PIA) -- Bisan kon wala’y ultra cold freezer ang Bohol, mahimo kini nga modawat sa labing gipangita nga bakuna sa Pfizer-BioNTech batok sa Coronavirus disease (COVID).

Kini base sa kasayuran nga gipagawas sa Center for Disease Control ug sa mismong naghimo sa bakuna nga Pfizer, sa ilang instrruksyon nga gipataban sa pagpadala sa mga bakuna.

Tungod sa ka sensitibo sa bakuna sa Pfizer-BioNTech, kini mahidangat sa mga nasud sulod sa kinarton nga COVID-19 Vaccine Multiple Dose Vials nga isulod sa thermal containers nga puno sa dry ice.

Inig abut sa bakuna sa usa ka lugar, kinahanglan nga kuhaon kini dayon sa mga karon nga gisudlan niini gikan sa iyang termal containers ug isulod dayun sa ultra-low temperature freezer nga makapabugnaw og gikan sa -80ºC ngadto sa -60ºC (-112ºF to -76ºF) hangtud kini gamiton na o ilabay na kay expire na, subay sa label niini.

Hinuon, segun pa sa CDC ug sa Pfizer, ang mga vials mahimo nga tipigan sa -25°C ngadto sa -15°C (-13°F ngadto sa 5°F) hangtud sa duha ka semana, apan kinahanglan kini nga permi pakagingon ug dili palamdagan hangtud nga andam na nga itupok.

Dugang sa Pfizer,ang mga vials nga gitipigan sa -25°C ngadto sa -15°C (-13°F to 5°F) sulod sa duha ka semana, mahimo pa nga ibalik og sulod sa ultra low temperature freezer sa maka usa ka higayon.

Ang CDC ug Pfizer mipakapin pa sa pag-ingon nga kinahanglan nga dili molapas sa duha ka semana nga ang bakuna magawas sa iyang girekomenda nga tipiganan sa ultra low temperature freezer.

Matud sa Pfizer, kon walay ultra-low temperature freezer nga magamit sa usa ka lugar, mahimong gamiton ang thermal container nga unang gisudlan sa bakuna isip temporaryo nga sudlanan sa Pfizer-BioNTech COVID-19 Vaccine, apan kinahanglang kini kanunay nga pun-on ang ibabaw niini sa dry ice.

Matud pa, ang original thermal container isip temporaryong storage containers, makapabilin sa iyang temperature range nga -90ºC ngadto sa -60ºC (-130ºF to -76ºF).

Dili na mahimo nga ibalik ang mga vials nga gisudlan sa bakuna kon kini gipatunaw na human sa iyang pinakaging sa kabugnaw nga estado (frozen state).

Kini maoy pahimangno nga giluwatan sa Center for Disease Control ug sa mga tighimo sa bakuna nga Pfizer-BioNtech, ngadto sa mga vaccination teams nga modawat ug mogamit sa ilang bakuna. (rahc/PIA-7/Bohol)