DepEd, mohatag og 3 ka buwang

internet load sa mga magtutudlo

TAGBILARAN CITY, May 17 (PIA)--Hatagan sa Department of Education (DepEd) ang mga magtutudlo sa mga pampublikong tunghaan sa nasod og tulo ka buwang kantidad sa internet load karong nagpadayon pa gihapon ang distance learning sa nasod tungod sa pandemya sa COVID-19.

Matud pa sa pahayag nga gipagawas ni DepEd Undersecretary Alain Pascua, sa pagkakaron nipalit na ang ahensiya og connectivity load nga adunay 30 hangtod 35 gigabytes (GB) nga kantidad sa data matag buwan alang sa mga public school teachers.

Sugdan sa DepEd ang pagpanghatag sa maong internet load sa mga magtutudlo sa Hunyo.

Si Pascua nagkanayon nga ang mga dili magamit nga data allocation i-rollover sa mga mosunod nga buwan sulod sa usa ka tuig hangtod padayon na nilang makonsumo ang tibuok 100GB nga data.

Gidugang usab niini nga gipaabot nilang daghan nang mahimo ang mga magtutudlo sa maong bandwidth nga ihatag ngadto kanila.

“Ine-expect namin na higit tatlong buwan hanggang anim na buwan magagamit ng teacher itong connecti­vity load,” matud pa ni Pascua.

Ang DepEd naggahin og P1.2 bilyong pondo alang niining programa.

Ang maong data load ang gihulip sa plano kaniadto sa DepEd nga mohatag og P450 load allowance sa mga magtutudlo.

Base sa datos sa DepEd, adunay kapin sa 800,000 ka magtutudlo sa mga pampublikong tunghaan sa nasod. (ecb/PIA7-Bohol)