Governors, mayors gibutang na sa

A1.5 priority list sa COVID-19 vaccine

TAGBILARAN CITY, May 17 (PIA)--Gibutang na sa mas taas nga priority listing alang sa bakuna batok coronavirus disease (COVID-19) ang pipila ka politiko, base sa bag-ong desisyon nga gipagawas sa Inter-Agency Task Force on Emerging Infectious Diseases (IATF-EID).

Ubos sa IATF Resolution No. 115-B, gibutang na sa A1.5 priority ang mga gobernador ug mayor — isunod sila sa mga healthcare workers apan mas una sa mga senior citizens.

Gipagawas ang bag-ong sumbanan pila ka buwan human ang kontrobersiya sa "VIP vaccination" sa pipila ka politiko, bisan dili pa sila apil kaniadto sa priority list.

Ang palusot sa pipila sa nauna nang nabakunahan batok sa COVID-19, nahatagan sila dayon og bakuna isip "substitute" sa mga angay nga mabakunahan niadtong adlaw sa immunization.

"Napagkasunduan ng IATF na ang mga gobernador at ang mga mayor ay mapapabilang na rin po sa priority A1.5... Sa mga mayors at governors, magpabakuna na rin po tayo," pahayag pa ni presidential spokesperson Harry Roque.

Kini matud pa ni Roque tungod kay ang mga mayor ug gobernador ang nagpatuman sa prevention, detection, isolation, treatment ug rehabilitation nga maoy “cornerstone” sa COVID-19 program sa nasod.

Gidugang pa niini nga ang maong mga nahisgotang opisyales sa mga lokal nga kagamhanan ang direktang nagpatuman og localized lockdowns, pagpabakuna ug uban pang mga aktibidad batok sa pandemya.

"They may not be doctors, but they are equally frontliners dahil ang lahat po ng mga estratehiya natin, ang humaharap po ang mga lokal na opisyales: si mayor at si governor," pasabot pa ni Roque. (ecb/PIA7-Bohol)

Ubos sa IATF Resolution No. 115-B, gibutang na sa A1.5 priority ang mga gobernador ug mayor nga mabakunahan batok sa COVID-19. (PIA)