Bohol COVID-19 fatality rate: 

1.3 mas ubos pa sa nasud nga 1.8

TAGBILARAN CITY, Bohol, May 18 (PIA) -- Bisan pa sa nagkasaka nga kaso sa coronavirus disease dinhi sa Bohol, ubos pa gihapon sa nasudnon nga fatality rate sa mga nangamatay sa COVID-19 dinhi sa pagka karon nga naa lamang sa 1.30.

Sukad sa pagsugod sa pagtakod sa sakit dinhi sa Bohol niadtong Marso sa mi-aging tuig, mikabat na sa kinatibuk-an nga 3,516 ang kompirmado nga kaso ug niini, 46 lang ang namatay o naa sa 1.3 ka pasyente sa matag usa ka gatus nga nagka-COVID.

Gani, ang 3,516, mao lamang kini ang kompirmado nga nagpositibo sa COVID -19 gikan sa 60,611 ka mga swab samples nga nakuha ug gikaduso sa mga molecular laboratories alang sa pagproseso niini.

Sa nahisgutan nga kadaghanon, ang kinatibuk-an nga positivity rate, anaa sa 5.8 porsyento sa matag 100 nga swab samples nga giproseso.

Sa 3,516 usab, segun sa taho sa Bohol Inter Agency task Force, kasamtangan nga anaa lamang sa 81.48 sa 2865 ka mga Bol-anon nga nadeklara na nga clinically recovered.

Sa laktud nga pagkasulti, adunay 81 porsyento sa matag usa ka gatus ka Bol-anong nga masakit sa COVID ang mauli-an ra og maayo.

Ang Bohol , kon adunay 1.3 porsyento nga fatality rate, kon itandi sa tibuok Pilipinas, may ubos pa nga fatality rate usab.

Ang fatality rate sa Pilipinas anaa sa 1.8 percent, nga ubos pa usab sa global rate nga 2.2 percent.

Sa Mayo 18, napun-an hinuon og usa ang namatay sa Bohol tungod sa COVID ug karon anaa na sa 46 ang namatay sulod sa us aka tuig ug duha ka buwan.

Sa active case map nga gipaambit sa BIATF, napakita nga may 605 nga kinatibuk-ang aktibo nga kaso sa COVID sa Bohol, 584 niini mga residente, 20 ang mga health care workers nga naangin ug usa ka kaso sa COVID ang gikan sa gawas sa lalawigan ug nadala sa mipauli nga residente.

Niining adlawa, 216 pa gihapon ang kaso sa Tagbilaran City, gisundan sa Catigbian nga may 57, dayon sa Bilar nga may 42 ka kaso, dayon ang Loon nga may 37.

Ang Dauis, naa pa gihapon sa sulod sa napulo ka lungsod nga may labing daghan nga kaso sa 21, ug gisundan sa nagtabla nga Maribojoc, Candijay ug Panglao sa parehong kadaghanaon sa na-COVID nga miabut sa 16.

Naa sa ika walo nga pwesto ang Ubay sa iyang 14 ka kaso samtang ikanapulo ang Balilihan ug Baclayon nga may tabla nga 13 ka kaso. (rahc/PIA-7/Bohol)

PABILING MAGTAMUD SA LAGDA. Kini ang panawagan ni Dr. Fruserma Mary Uy ngadto sa mga Bol-anon samtang nagpadayon pa ang hulga sa COVID-19. Sul-ob sa mask, face shield, panghunaw permi ug distansya kon may ikauban sa usa ka lugar. (PIA Bohol)