DOH may bag-ong giya alang sa 

pagpangbakuna sa nagkaCOVID

TAGBILARAN CITY, Bohol, May 17 (PIA) -- Dili na kinahanglan pa nga magpaabut og 90 ka adlaw aron mabakunahan na ang kadtong mga nasakit og coronavirus disease (COVID), aron dili na sila mapurohan kon mobalik man ugaling ang sakit.

Kini maoy unod sa Advisory No. 41 nga gipagawas sa National Task Force on COVID 19 (NTF) ug sa National Vaccination Operations Center (NVOC) Mayo 15, subay usab sa Philippine COVID-19 Vaccine Deployment and Vaccination Campaign.

Ang Advisory No 41, naghingusog sa Scheduling sa pagpangbakuna sa mga Individuals nga nasakit na sa COVID-19.

Matud pa ni Health Undersecretary Myrna C. Cabotaje, chairperson sa Field Implementation and Coordination Team sa National COVID-19 Vaccination Operations Center sa Department of Health, ang Advisory gipagawas pag reiterate sa mga probisyones sa DOH Memorandum No. 2021-0175 kabahin sa scheduling sa pagpangbakuna sa mga nasakit na sa COVID-19.

Segun sa nahisgutan nga Department Memorandum: “...ang tanan nga bakunahanan nga nasakit sa COVID-19 mahimo na nga bakunahan sa una o ikaduha nga dose sa bakuna human sila mauli-e ug maayo na sa sakit ug mahuman na sa pagpatambal ug dili na kinahanglang mobalik pa sa unang dose kadtog nasugdan na og tupok.

Subay usab niini, ug habig pa gihapon sa DOH Memorandum No. 2020-0512 nga giila sa ulohan nga “Revised Omnibus Interim Guidelines on Prevention, Detection, Isolation, Treatment and Reintegration Strategies for COVID-19,” kadtong mga modawat sa bakuna batok sa COVID-19 mahimong bakunahan.

Alang sa mga nagkacovid nga may kasarangan nga simtomas, mabakunahan sila human sa 10 ka adlaw nga isolation gikan sa unang adlaw nga milugawa ang mga simtomas lakip na ang tulo ka adlaw nga napamatud-an nga clinically recovered ug wala nay simtomas.

Alang sa mga pasyente nga may grabe nga simtomas, mabakunahan sila human sila makakompleto sa labing menos 21 ka adlaw nga isolation sulod sa usa ka hospital, human manggawas ang simtomas ug lakip na ang tulo ka adlaw nga mapamatud-an nga siya clinically recovered na ug wala nay simtomas.

Alang sa mga nagpositibo nga nagkacovid apan walay simtomas nga gipakita, (immunocompetent) nga indibidwal, mabakunahan sila kon ilang mahuman ang 10 ka adlaw nga isolation sugod sa unang adlaw nga gikuhaan sila sa swab samples.

Alang sa mga close contacts ug nagpabilin nga wala gyuy simtomas, mahimo silang bakunahan human sa labing menos 14 ka adlaw nga kwarantina gikan sa petsa kanus-a siya na expose sa may sakit.

Niini, ang mga RVOCs gimanduan sa pagseguro sa pagpatuman niining nahisgutang Advisory dugang sa pag-ingon nga kon aduna may mga suliran, pangutana ug ubang concerns niining Advisory, mahimo nga mapakisayud pinaagi sa pag email ngadto sa NVOC sa c19vaccineopcen@gmail.com. (rahc/PIA-7/Bohol)