DOH: Inahan nga na-COVID, 

pwede magpasuso sa bata

TAGBILARAN CITY, Bohol, May 25 (PIA) -- Mahimo ba nga ang usa ka inahan nga may masuso, magpasuso gihapon bisan kon aduna siyay coronavirus disease (COVID)?

Matud pa sa Department of Health (DOH), mahimo, gani gikinahanglan gayud tungod kay gikinahanglan ang sakto ug kompleto nga nutrisyon sa bata nga ang gatas sa inahan lamang ang makahatag.

Mahimo, apan gikinahanglan nga ang inahan, sa dili pa mogunit sa bata, manghunaw ug manarapo sa alcohol-based dis-infectant o tubig ug sabon sa dili pa mosapnay sa bata.

Importante, matud pa sa mga tinugyanan sa kasanihan nga mabatasan sa inahan ang pagpanghunaw permi, aron maseguro usab ang kaluwasan dili lamang sa bata apan usab sa mga sakop sa banay.Ikaduha, kinahanglan nga ang inahan, magsul-ob una og face mask sa dili pa mosapnay sa iyang masuso.

Gani, sanglit ang usa sa mga simtomas sa COVID mao man ang pag-ubo ug pagpanghatsi, kinahanglan nga ang inahan, kon moubo ug manghatsi, adto siya manghatsi ug moubo sa disposable nga tissue aron dali ra kini nga ikalabay sa selyado nga basurahan kay delikado kining manakod.

Dugang pa sa DOH, kinahanglan usab nga batasanon ang kanunay nga pag-disinfect sa mga butang nga magunitan permi sa inahan, permi mahikapan ug kadtong permi nga mahikapan sa masoso sama sa teether, mga duwaan nga naa sa sulod sa kuna ug sa mga mahimong ihungit sa bata. (rahc/PIA7/Bohol)

WALAY PROBLEMA. Matud pa gani sa mga eksperto, mas daku nga proteksyon ang makuha sa bata sa gatas sa inahan nga mahimong iyang panalipod batok sa sakit. (rahc/PIA-7/Bohol)