Pinas, ika-2 sa vaccination

rollout sa Southeast Asia

TAGBILARAN CITY, May 24 (PIA)--Ikaduha na ang Pilipinas sa estado sa vaccination rollout sa Southeast Asia.

Kini human nisaka na sa 4,097,425 doses ang naapod-apod sa mga katawhan, matud pa sa National Task Force Against COVID-19 niining semanaha.

Base sa datos nga gipagawas sa National Vaccination Operations Center (NVOC) niadtong Mayo 23, naa sa 4,097,425 kinatibuk-ang doses sa bakuna ang nahatag sa publiko sa Pilipinas samtang nanguna ang Indonesia sa 24,723,728 doses.

Naapsan na usab sa Pilipinas ang Cambodia (3,673,639) nga naa sa ikatulo ug ang Singapore (3,407,068) nga naa sa ikaupat nga puwesto na lamang samtang naa sa ikalima ang Myanmar (2,994,900).

Naa sa ika-13 nga puwesto ang Pilipinas sa 47 ka nasod sa Asya ug ika-37 gikan sa 196 ka nasod sa tibuok kalibotan.

Kapin sa 4 ka milyong Filipino na usab ang nabakunahan sa tibuok nasod o 949,939 ang ‘fully-vaccinated,’ na samtang 3,147,486 ang nakadawat na sa ilang unang dose.

Sa usa ka pahayag, nagtuo si vaccine czar Kalihim Carlito Galvez Jr. nga madoble nila ang gidaghanon sa mga mabakunahan sa Hunyo sa pagsugod sa pagbakuna sa mga ‘economic frontliners’ ug ‘indigenous population’ basta padayon lang ang pag-abot sa mga bakuna sa nasod.

Gawas niini, posible usab nga makab-ot na ang herd immunity sa nasod sa dili pa mahuman ang tuig. (ecb/PIA7-Bohol)

Base sa datos nga gipagawas sa National Vaccination Operations Center (NVOC) niadtong Mayo 23, naa sa 4,097,425 kinatibuk-ang doses sa bakuna na ang nahatag sa publiko sa Pilipinas. (PIA)