Mga dili taga-Cortes, gidid-an una 

pagsulod sa merkado sa ting-tabo

TAGBILARAN CITY, Bohol, May 24 (PIA) -- Dili pa gihapon tugotan ang mga dili taga-Cortes nga modisplay sa ilang mga manggad ug baligya sa adlaw sa tabo, ug mga dili taga lungsod nga manabo ug mamalit didto sulod sa merkado matag Sabado.

Kini maoy pagdason sa nahauna nga Memorandum Circular 2020-07-02 nga gipagawas ni Mayor Lynn Iven Lim niadto pang mi-aging tuig ug gipahinumdom niining bag-o pa lamang.

Kini human namatikdan nga may nga taga lain nga lungsod nga nakakuhag pwesto sa sulod sa merkado sa Cortes, nga magsudlanan sa ilang pwesto, nga gikahadlokan nga makadala sa pagpanakod.

Kahinumduman usab nga niadtong Hulyo sa mi-aging tuig, nahimo nga gihugtan ang pagpasulod-gawas sa merkado sa Cortes sa adlaw sa tabo niini human may nagdumala sa usa ka bugasan nga gidudahan nga nagpositibo sa sakit nga Coronavirus disease (COVID).

Niini, subay usab sa pagdeklara ni Presidente Rodrigo Duterte sa state of calamity sa nasud dala sa Public Health Emergency nga dala sa COVID-19 niadtong marso 9, 2020, ug sa rason nga padayon nga nagpangtakudtakod pinaagi sa local transmission, gipagawas sa mayor ang mandu.

Sanglit gihatagan sa InterAgency Task Force ang mga mayor sa katungod sa pagdumala sa local nga mga kahimtang sa sakit nga mananakod subay usab sa lagda sa BIATF, gidason sa mayor ang temporaryo nga prohibisyon.

"Hibaw-I nga padayon pa gihapon ang temporaryo nga suspension sa mga dili taga Cortes nga mamaligya sa atong merkado sa matag Sabado, adlaw sat abo, ug sa mga dili taga lungsod nga mosulod sa merkado sa adlaw sa tabo," sulti sa mayor pinaagi sa MC.

Kini tuingod kay ang lungsod nagpadayon pa sa pagpatuman sa mga lakang sa pagpakunhod sa posibilidad sa pagpanakod sa gikahadlokan nga sakit.

Niining adlawa usab, 11 pa ka Cortesanon ang natakdan sa sakit ug padayon nga nagpaayo sa ilang kahimtang sulod sa mga isolation facilities sa lungsod. (rahc/PIA-7/Bohol)

GWARDYADO. Hugot nga gipatuman sa mga kapolisan sa Cortes ang pagbantay nga wala gyu'y taga laing mga lugar nga makasulod sa merkado aron manabo kay daghang nahadlok nga kini maoy sinugdanan sa pagpanakod. (PIA Bohol/Cortes PS)

AGI OG TABANG SA LOKAL NGA NEGOSYANTE. Temporaryo nga gihatagan og pabor sa LGU Cortes ang mga taga lungsod nga mao lang usa ang makapamaligya sulod sa merkado tungod kay sila ang labing apektado ug mawani kon anaa tong dagkong mga tindahan. Kini agi usab og panalipod batok sa COVID-19. (PIA Bohol/Cortes PS)