DOH may awhag sa mga 

mosaulog sa Eid’l Fit’r

TAGBILARAN CITY, Bohol, May 10 (PIA) -- Alang sa mga igsoon nga Muslim nga motapos sa balaan nga buwan sa Ramadan, mipahinumdom ang Department of Health nga sa pagsaulog sa Eid’l Fit’r, sundon gyud permi ang minimum public health standards ug local nga mga tamdanan sa kwarantina.

Alang niadtong mga igsoon nga muslim nga naglaraw sa pag-adto sa mga mosque o sa mga pangpublikong lugar ampo-anan, gitambagan nga mosubay gyud sa usa ka metros nga distansya sa sunod nga nag-ampo, ang kanunay nga pagtaud sa face mask ug sakto nga pagtaud sa face shield.

Maayo usab nga segurohon nga sa moske o lugar ampo-anan, may igo nga kahamugaway nga paglapuslapos sa hangin, ug dili na aglanagn pa, dili magpasobra sa 15 minutos didto.

Giaghat usab sa paghinumdom sa pagpanghunaw ug pagpamatayg kagaw sa mga lugar ug butang nga perming magunitan, ug sa pagsunod gayud sa mga lagda nga gipahiluna sa mga tinugyanan sa moske ug sa kagamhanan.

Gani, kon dunay dili maayong gipamati sa lawas, ayaw na lang gyud og adto, bisan pa nga mihangyo ang DOH nga adto nalamang himoon ang pag-ampo ug pagsaulog sa Eidl Fitr sa balay kauban ang pamilya alang sa mas luwas nga kasaulogan.

Human motambong sa mga kalihukan sa gawas, aghat sa DOH, pagpahigayon sa kinaugalingon nga kwarantina sulod sa 14 ka adlaw ug adto pagpuyo sa usa ka lawak nga dili maduolan sa ubang sakop sa banay.

Didto, imonitor ang kaugalingon batok sa hilanat, sip-on, pangluya, pagkawala sa panimpla, pamaol, labad sa ulo, aran nga tutonlan, baradong ilong, namula nga mata, kalibanga ug pagpamulapula sa panit.

Kon makasinati sa bisan hain man niining ania sa unahan, pahibaw dayon sa Barangay Health and Emergency Response team.

Labing hugot nga gidili ang pagpakigsagol sa mga edaran na, ug kadtong may mga gibati na nga daan nga sakit.

Ngadto usab sa mga tinugyanan sa local nga kagamhanan, aghat sa DOH, mas dali nga mapugngan ang pagkatag sa COVID kon sayo kining mamatikdan. Usab, hugot nga ipatuman ang minimum public health protocols ug himoang mas aktibo pa ang surveillance.

Ang susamang panawagan, gibugtaw usab sa DOH ngadto sa publiko kay ang mga lagda, nakapalita na nga kini magpugong sa pagtakod ug pag-sagop sa COVID sa bag-o nga dagway. (rahchiu/PIA-7/Bohol)