Wala’y PhilSys appointment slips? 

Ipakita lang ang PSA text notice

TAGBILARAN CITY, Bohol, May 10 (PIA) -- Dili gyud unta wad-on ang appointment slips nga gihatag sa Philippine Statistics Authority (PSA) aron matibawas ang Step 2 sa pagparehistro sa Philippine ID system (PhilSys), kini maoy gipadayag sa information officer sa ahensya, Emmanuel Galab.

Ang appointments slip usa ka pamaagi nga gisagop sa PSA aron dili maghan-ok ang tawo nga moparehistro subay sa social distancing nga polisiya batok sa COVID-19.

Ang pagpatuman sa PhilSys gilantaw sa kagamhanan nga makahatag ngadto sa mga ubos og kita nga banay sa posibilidad nga makabukas sila og account sa bangko, diin ikapadagayday ang mga hinabang sa goberno.

Una na nga gipasangil sa mga katawhan ang mga iregularidad sa pagpanghatag sa ayuda sa kagamhanan, ilabi na kon kini ipaagi sa mga politico.

Kahinumduman nga subay niini, gihimo sa PSA ang step one o preregistration sa mga Pinoy sugod sa mga may ubos ang kita ngadto sa mga senior citizens, mga persons with disability (PWD) ug mga nawani sa katilingban, sa nasampit nga mga rason sa unahan.

Dinhi sa Bohol, gibuksan sa sa PSA ang ikaduhang hugna sa pagpanghegistro ug kini mao na ang pagkuha sa vital digital information ug biometrics sa mga morehistro, pinaagi sa face to face nga pamaagi.

Hinuon, giseguro sa mga tigpasiugda sa mga Step 2 Registration Centers sa kalungsuran nga ang ilang kalihukan nagsubay sa minimum health standards batok sa COVID.

Aron kini mapatuman ug walay mga tawo nga mapahimutang sa delikado, gipanghatag sa PSA ang appointment slips diin nahimutang ang petsa, lugar ug oras alang sa ikaduhang ang-ang sa pagparehistro ug kini maglangkob sa pagkuha sa hulagway, pagkuha sa tamla sa kumagko ug nga tudlo sa kamot.

Kuhaon usab atol sa ikaduhang hugna sa registration diha sa mga kalungsuran ang iris scan, diin ang mata sa usa ka tawo, kuhaan og ilhanan sa pagkatawo.

Pipila pa ka buwan o mga semana ang lanat gikan sa ikadungang lakang sa pagrehistro ngadto sa ikaduha nga hugna, may nga nakarehistro nga nawala na ang ilang appointment slips.

Hinuon, butyag ni Galab, sanglit ang PSA nagpadala sa ilang mga pahibaw sa mga morehistro sa ilang petsa, lugar sa pagparehistro sa ikaduhang hugna, pinaagi sa text, mahimo ra nga maoy ipakita ang text message nga nadawat sa personal nga pagpahibaw alang ikaduhang rehistro.

Palisiya nga gisagop sa PSA ang walay balibaran kon luag lamang ang schedule, apan matud ni Galab, tan-awon lamang usab sa moparehistro kon dili ba delikado kon daghan ang tawo nga tua didto.

Gidugang ni Galab, nga hangtud karon, wala pa makabukas ang ilang online registration hubs, bisan pa nga kini gipananghid pa sa nasudong ahensya.

Mao nga tambag sa PSA, subaya ang pahibaw nga ipadala sa PSA ngato kanimo sa imong cellphone aron makaseguro nga dili maghuwat og taas aron usab sila malangan ug ma-expose na hinuon sa COVID-19. (rahc/PIA-7/Bohol)

WALAY BALIBARAN. Bisan pa kon gisagop sa PSA ang palisiya nga walay balibaran sa moanha, apan mas maayo og subay gihapon sa schedule aron dili maexpose sa daghang tawo ug maghuwat sa oras nga maoy makalangan kon may daghan pag lakwon. (rahc/PIA-7/Bohol)