LGU, PNP estoryahon sa DILG kalabot sa pag-

aresto sa mga di magsuot og facemask sa publiko

TAGBILARAN CITY, May 6 (PIA)--Makig-alayon na ang Department of the Interior and Local Government (DILG) sa mga Local Government Units (LGUs) ug Philippine National Police (PNP) aron mahiusa ang mando ni Presidente Rodrigo Roa Duterte nga arestohon ang mga indibidwal nga wala nagsuot og face mask.

Matud pa sa pahayag ni DILG Usec. Jonathan Malaya, kinahanglan nilang ma-estorya ang LGUs aron masusi ang mga ordinansa ug ang PNP alang sa pagdetermina sa parameters sa direktiba sa Presidente.

Gitumbok ni Malaya nga ang mga lokal nga ordinansa ang maligsan niini mao nga kinahanglan usab nilang tan-awon kun unsaon nila mapatuman ang direktiba sa Presidente.

Gidugang usab ni Malaya nga ang mga LGU na ang magpatuman sa mga silot sa mga dili mosunod sa pagsuot og face masks.

Kahinumdoman nga gipasidan-an ni Presidente Duterte ang publiko nga arestuhon sa polis ang wala nagtarong og suot sa ilang face mask.

Tungod kini sa pagkadismaya sa Presidente sa padayong pagsaka sa kaso sa COVID- 19 sa nasod ug usa sa giingong hinungdan mao ang dili tarong nga pagsuot sa mask.

Gipasabot ni Duterte nga kinahanglang mag-istrikto sa pagpatuman sa basic o minimum health protocols tungod kay kulang na sa pondo ang gobyerno alang sa panginahanglan sa mga apektado sa pandemya.

Gawas niini, daghan na matud pa ang namatay tungod sa COVID 19 ug puno pa usab ang mga ospital sa mga pasyente. (ecb/PIA7-Bohol)