San Miguel mipaambit sa 

sekreto batok sa COVID-19

TAGBILARAN CITY, Bohol, May 7 (PIA) -- Hugot nga pagpatuman sa mga minimum health ug safety proptocols sa walay pagpihigpihig.

Kini maoy gipadayag ni San Miguel Mayor ug Atty. Virgilio Mendez, sa iyang pagpaambit ngadto sa tibuok Pilipinas atul sa gipahigayon nga Network Briefing sa Radyo Pilipinas niadtong Mayo 6.

Si Mendez, kinsa kanhi national director sa National Bureau of Investigation, midugang sa pagtaho nga gawas sa hugot nga pagpatuman sa mga protocols, kini giabagan usab sa estrikto, kakugi ug rasonable nga pagpasunod sa mga polisiya sa mga tinugyanan ug kapolisan.

"Among gipahugtan, estrikto namo nga gisunod ang minimum health protocols, gitutokan ang contact tracing ug gilig-an ang testing sa mga taga San Miguel nga posible nga nakaduol sa usa ka contact samtang gibantayan nga walay makalapas sa social distancing," saysay sa mayor didto sa programa nga gipasiugdahan sa Presidential Communications Operations Office.

Gawas pa, gibutyag sa mayor nga iyang gimanduan ang kapolisan nga seryosohon ang pagpatuman sa face masks ug social distancing, bisan pa nga ang lungsod maoy labing una sa Bohol sa pagpakanselar sa mga kalihukan nga magpatapok sa tawo sama sa Womens Month Culmination, mga pabuwang, kasaulogan sa Charter Day ug pista.

Epektibo usab ang ilang contact tracing team kay, matud niya, ang tanan nga sakop niini, pulos lamang taga San Miguel ug mas nakaila sa mga gipangbantayan.

Ug kon, sa panahon sa lockdown, gipaseguro sa San Miguel nga suportahan gayud ang mga natanggong sa lockdown.

"Amo silang gihatagan sa pagkaon ug nag-unang panginahanglan, mao nga wala na sila rason nga mogawas kay mangita pa alang niini," pasabut sa mayor.

Gisugid usab sa mayor nga kini nga klaro nga mga palisiya, gisunod usab sa mga tawo human sila nakasabot og maayo ngano nga kinahanglan kining mga tamdanan nga sundon, kay matud pa nila, kaayohan ug kaluwasan man diay usab sa ilang mga pamilya ang sangputanan.

Alang sa mga mamauli nga mga residente nga naapil sa locally stranded individual (LSI), sulti sa mayor nga sa dili pa nila hatagan sa Certificate of Acceptance, estoryahan kini sa ilang mga protocol officers ug sutaon gayud kon may gipamati man nga lain sa lawas bisan pa nga wala gayuy gipalusot nga wala makadala sa negatibo nga RT PCR subay usab sa lagda sa lalawigan.

Sa pagpakigtambayayong sa kapolisan, gihimo sa lungsod nga ang kapolisan mismo maoy mokuha sa tawo nga nahinganlan sa contact tracing iug mao nay modeliver niini sa sulod sa quarantine facility sa lungsod human ma kuhai sa swab samples ug dili na makagawas hangtud nga mogawas nga negatibo na ang nahisgutang tawo.

Alang niadtong gipailawom sa 14 ka adlaw nga kwarantina, saysay sa mayor nga wala gyud nila sipyata ang pagpailawom sa swabbing ug pagtesting pag-usab aron ang si bisan kinsa nga motapos sa kwarantina, segurado gayud nga dili na makatakod kon ugaling may kagaw man nga nadala.

"Sa padayon nga paghimo niining tanan, ug sa kalooy sa Ginoo, zero na kami, wala na kami positive cases, Mayo 6," butyag sa mayor.

Usa pa, sa 45 ka mga kaso nga natala sa lungsod sugod sa Mayo sa miaging tuig, 44 niini ang nanga-ayo na samtang may usa nga nahunosan gyud sa kinabuhi, subo nga taho sa Mayor. (rahc/PIA-7/Bohol)

WALA USA KITA KARON. Sa pista sa San Miguel, Mayo 8, 2021, mihangyo ang mayor nga dili usa manawat og mga bisita nga dili taga san Miguel samtang naningkamot ang mga tinugyanan nga dili makasulod ang sakit ngagikaintapan. (PIA Bohol)