Mga bag-ong opisyal sa AUDIO-Bohol, 

nanumpa sa katungdanan

TAGBILARAN CITY, May 11 (PIA)--Nanumpa sa pangatungdanan ang mga bag-ong napili nga opisyal sa Association of United Development Information Officers (AUDIO) Bohol atubangan ni Gob. Arthur Yap niadtong Lunes, Mayo 10, 2021, didto sa Greenthumb Farm Al Fresco Resto, lungsod sa Corella.

Ang AUDIO-Bohol usa ka hiniusang bahan sa mga information officers sa kalungsoran kun local government units (LGUs) ug mga ahensya sa kagamhanan kun national government agencies (NGAs) nga nagtambayayong sa pagpakatap sa mga kasayoran ngadto sa katawhan sa mga kalungsoran.

Sa iyang mensahe ngadto sa mga bag-ong napiling opisyal, si Gob. Yap nitumbok sa kamahinungdanon sa papel sa mga information officers ilabi na karong panahon nga may pandemya.

"You are a very important sector to our province in these critical times. Your work is to inform, to educate, to inspire, to raise the people's consciousness on issues, this need not be belabored", matud pa ni Yap ngadto sa mga bag-ong opisyal sa AUDIO-Bohol.

Dakong kalipay ug garbo sa gobernador nga siya ang gihimong inducting officer sa maong asosasyon diin sila ang usa sa mga manguna sa pagpakatap og mga kasayoran kabahin sa kalamboan sa probinsya ug sa nasud.

Gihagit usab sa gobernador ang mga bag-ong napiling opisyal nga dili magpadala sa mga balita nga dili tinuod, dili mahinungdanon ug adunay diskriminasyon tungod kay dili lamang sila media apan mga development information officers sa probinsya.

Napili si Ma. Lydia Bantugan, ang information officer sa Department of Agrarian Reform (DAR) isip presidente sa AUDIO-Bohol alang sa tuig 2021-2022.

Ang ubang opisyal nga nanumpa naglakip nilang: John Larry Evangelista sa Munisipalidad sa Ubay isip Vice President for LGUs; Leonardo Cirujales sa Pag-IBIG Fund isip Vice President for NGAs; Doris Isabel Racho sa Agricultural Training Institute (ATI) 7 isip Secretary; ug Elvie Bongosia sa Philippine Information Agency (PIA) isip Assistant Secretary.

Samtang nanumpa usab si Rosario Chatto sa Bureau of Internal Revenue (BIR) isip Treasurer; Emilou Gonzaga sa National Commission on Indigenous People (NCIP) isip Assistant Treasurer; Khem Pendejito sa Munisipalidad sa Garcia Hernandez isip Auditor; Sherwin Viva sa Government Service Insurance System (GSIS) isip 1st District Press Relations Officer; Manuelito Item sa Munisipalidad sa Bien Unido isip 2nd District PR Officer; ug Imee Raut sa Munisipaliidad sa Lila isip 3rd District PR Officer.

Ang AUDIO-Bohol ubos sa pagdumala sa Philippine Information Agency nga gipangunahan sa Information Center Manager niini nga si Rey Anthony Chiu. (ecb/PIA7-Bohol)

Opisyal nga giadminister ni Bohol Gob. Arthur Yap ang pagpanumpa sa katungdanan sa bag-o nga bahan sa mga opisyal sa AUDIO-Bohol alang sa CY 2021-2022 niadtong Mayo 10, 2021 didto sa Greenthumb Farm Al Fresco Resto, lungsod sa Corella. Napili si Ma. Lydia Bantugan, ang information officer sa DAR isip presidente sa maong kapunongan. (PRIMER/PIA-Bohol)