DOH nipasidaan batok sa nikatap nga

email kalabot sa COVID-19 benefit packages

TAGBILARAN CITY, June 8 (PIA)--Nipasidaan ang Department of Health (DOH) kalabot sa nikatap nga email kalabot sa COVID-19 benefit packages.

Sa gipagawas nga pahayag sa DOH, giingong gigamit ang email address nga doh@doh.com diin matud pa sa buhatan, dili kini ang opisyal nga email address sa ahensya o sa ilang mga empleyado.

“While there are existing benefit packages for healthcare workers, DOH will not send individual emails to sign up for these”, matud pa sa gipagawas nga pahayag sa DOH.

Gisubli pa sa DOH nga dili sila ug ang Inter-Agency Task Force for the Management of Emerging Infectious Diseases (IATF) magpadala og bisan unsang email aron mang-awhag sa tanang healthcare workers ug hospital workers nga magparehistro aron makadawat og COVID-19 benefit package.

Matud pa nga wala usab DOH-IATF COVID Task Force National Center Health nga gigamit sa email signoff.

Gidugang pa sa DOH nga ang ilang official website mao ang www.doh.gov.ph, samtang ang link nga naka-attach sa unofficial email mao ang www.doh.gov-org/coronavirus/2019-nCoV/newcases-cities.html nga wala giila sa ahensya.

Pasidaan pa sa DOH sa publiko, mag-amping sa pag-abli sa bisan unsang link gikan sa maong email.

“Futhermore, we discourage individuals or groups from creating, perpetrating or spreading false information regarding the COVID-19 crisis on social media and other platforms,” pahayag pa sa DOH.

Gi-awhag usab ang publiko sa pag-report sa sayop nga impormasyon nga makita online pinaagi sa KIRA Chatbot sa DOH nga mahimong ma-akses sa Viber o Messenger. (ecb/PIA7-Bohol)