Hunyo gisubhan, 3 dayun 

namatay sa COVID-19 sa Bohol

TAGBILARAN CITY, Bohol, June 2 (PIA) –Aron paghatag og gibug-aton sa panginahanglan nga makab-ot sa nasud ang herd immunity pinaagi sa pagpabakuna, gikataho nga tulo na usab ka Bol-anon ang namatay tungod sa corona virus disease (COVID-19) sa pagsugod pa lamang sa buwan sa Hunyo.

Ang tulo nga gikataho nga namatay sa Hunyo 1, maoy nagdala sa kinatibuk-an nga casualty sa sakit nga hilabihan ka mananakod ngadto na sa 58.

Sa 58 usab, 41 niini ang nahitabo sa 2021, usa ka tuig gikan sa pagpanarangka sa Bohol aron did-an ang pagsulod unta sa COVID dinhi.

Sukad sa Marso 16 dihang gisugdan sa Bohol ang pagpatuman sa mga kwarantina, natala ang unang kaso sa pagkamatay sa COVID pila ka buwan ang milabay.

Sa pagtapos sa tuig, mi-abut na sa 17 ang nakalas nga kinabuhi, samtang gipaabut sa kagamhanan ang pagkatibawas sa mga bakuna nga gituohang maoy usa sa mga solusyon sa suliran sa sakit nga mananakod.

Sa pagsulod sa tuig 2021, sa Enero ug Pebrero, mitala og napulo ka kinabuhi ang nakalas samtang gitun-an na sa Food and Drugs Administration sa nasud ang mg a bakuna nga nangayo na og Emergency Use Authority aron mahimong ipang-apod-apod sa Pilipinas.

Sa Marso 6, dihang unang nahidangat ang bakuna dinhi sa Bohol, milanog usab ang pagduhaduha sa mga Bol-anon nga mas naminaw sa gituis nga balita kay sa sulti sa mga siyentipiko, mao nga minggawas ang pagduhaduha nga magpabakuna.

Segun pa sa mga survey nga gihimo sa Department of Health, ang kasagaran nga rason sa pagdumili tungod sa kahadlok sa side effects.

Samtang gipasugdan na sa Bohol ang pagpangroll-out sa bakuna, mitapos ang buwan sa Marso nga may 27 ang kinatibuk-ang kinabuhi nga nabuhis sa sakit.

Samtang nagkadaghan ang mga nagtrabaho sa medical front lines ang nakadawat sa ilang una nga mga tupokan batok sa COVID, mitapos gihapon ang buwan sa Abril nga may 13 ang namatay, wala niini medical frontliner.

Sa hinapos sa buwan sa Mayo, samtang miabut na sa 36 mil ka mga front liners ug senior citizens lakip na ang mga adunay laing sakit nga gipamati ang nabakunahan, miabut pa gihapon ang kadaghanon sa mga nangamatay sa 15.

Sa namatikdan nga nagkasaka ang kaso sa mga nangamatay gikan sa Abril (13) ngadto sa Mayo (15), ang tulo ka kaso sa unang adlaw sa Hunyo, nagpakita sa dili gihapon maayo nga talimad-on sa paghulga sa sakit.

Dala niini, mas gipalanod pa sa kagamhanan ang aghat ngadto sa mga nagduhaduha: pamati-a ang mga health experts.

Kon may kamatuoran pa nga may side effects ang bakuna, sa 36 mil ka Bol-anon nga nabakunahan ug sa 16,270 ka tawo nga nakakompleto na sa ikaduha nga tupokan, angay na unta nga may mabalita na nga dili maayong side effects sa mga nabakunahan.

Paminaw ug adto pangita sa saktong balita sa saktong tinubdan: ang DOH, World Health Organization ug ang mga ahensya sa kagamhanan. (rahc/PIA-7/Bohol)

PAGPABAKUNA UG PAGTAMUD SA MGA LAGDA. Gawas sa pagpasalig sa kagamhanan nga luwas ang pagpabakuna, gikinahanglan pa gihapon sa kadaghanan nga magtamud sa lagda aron hingpit na nga mabuntog ang COVID-19. (PIA Bohol/USFDA)