Independence Day holiday pay 

gipahinumdom sa DOLE sa mga employer

TAGBILARAN CITY, June 14 (PIA)--Gipahinumdoman sa Department of Labor and Employment (DOLE) ang mga employer kalabot sa saktong suholan sa ilang mga trabahante sa pagsaulog sa ika-123 Philippine Independence Day niadtong Sabado, Hunyo 12 nga usa ka Regular Holiday.

Base sa Labor Advisory No.12, Series of 2021, agi og pagsunod sa Proclamation No. 1107 nga gi-isyu ni Presidente Rodrigo Roa Duterte niadtong Pebrero 16, 2021, ang mga empleyado nga dili mosulod sa trabaho sa nahisgotang petsa bayran pa gihapon og 100% sa iyang sweldo.

Kun mo-trabaho sa mismong adlaw nga usa ka regular holiday, ang empleyado bayran sa kinatibuk-ang 200% sa iyang sweldo sa maong adlaw alang sa unang walo ka oras.

Samtang bayran og dugang 30% sa iyang hourly rate ang kawani nga molapas sa walo ka oras (overtime work) sa iyang pagtrabaho.

Kun natunong nga day-off o rest day ug ni-trabaho sa maong adlaw nga regular holiday, ang kawani kinahanglang bayran og dugang 30% sa iyang basic wage o daily rate og 200%.

Ug kun molapas sa walo ka oras o nag-overtime sa trabaho sa maong adlaw nga regular holiday, ang empleyado kinahanglang bayran og dugang 30% sa iyang hourly rate.

Apan tungod sa nagpadayon nga krisis dala sa COVID-19 sa nasod, ang mga establisyimento nga sarado o nag-ceased operation sa panahon sa community quarantine, exempted sa paghatag og holiday pay. (ecb/PIA7-Bohol)