PHLPost, nipasidaan batok

sa nikatap nga online scam

TAGBILARAN CITY, June 14 (PIA)--Nipasidaan ang Philippine Postal Corporation (PHLPost) sa publiko batok sa nikatap karon nga online scam.

Matud pa sa gipagawas nga pahayag sa PHLPost, gipa-amping ang publiko sa nikatap nga online scam gikan sa website nga www.parceltrackandtracing.com diin giingong mahimong makadawat og usa ka cellphone nga Apple IPhone 11 gikan sa PHLPost nga adunay delivery fee nga P19.00.

Gi-awhag sa buhatan ang publiko nga dili motuo ug dili tagdon ang nahisgotang website nga nag-ingon nga may parsela sila nga may sulod nga cellphone gikan sa PHLPost.

Giklaro sa PHLPost nga wala sila’y aktibong promosyon online sa pagkakaron.

Matud pa nga ang mga promosyon ug uban pang opisyal nga anunsyo nakapatik ug makita sa opisyal nga website sa PHLPost nga www.phlpost.gov.ph.

Gitambagan sa buhatan ang publiko nga alang sa ilang proteksyon, dili mohatag o magbutyag og bisan unsang personal nga impormasyon sa mga kadudahang website sa internet. (ecb/PIA7-Bohol)

Giklaro sa PHLPost nga wala sila’y aktibong promosyon online sa pagkakaron ug ang mga promosyon ug uban pang opisyal nga anunsyo nakapatik ug makita lamang sa opisyal nilang website nga www.phlpost.gov.ph. (PHLPost/PIA7-Bohol)