Mas responsable nga whale watching 

gipasalig sa Lila human sa pandemya

TAGBILARAN CITY, Bohol, June 4 (PIA) -- Gipasalig ni Lila Mayor Atty. Arturo Piollo II nga kon mabuksan man ugaling pagbalik ang ilang whale watching activity isip kalihukang pangturismo, kini mas gipanindot ug mas responsible na, kon itandi sa wala pay pandemya.

Kini ang gipadayag sa mayor atul sa Network Briefing nga gipahigayon sa Presidential Communications and Operations office (PCOO) isip plataporma sa mga local nga kagamhanan nga isibya sa tibuok nasud ang ilang mga inisyatiba sa panahon sa pandemya.

"It would be a better version of what we had before the pandemic," matud pa sa mayor dihang gi-interview ni PCCOO secretary Martin Andanar, sa Radio Pilipinas niadtong imaging semana.

Gitaho sa mayor nga ang tigpakita nga mga butanding sa Lila, sukad pa sa kanhiay nga panahon, ug karon ila nga gi-ugmad isip alternatibong kapanginabuhi-an sa mga taga didto.

Kahinumduman nga una na nga gibuksan sa lungsod ang whale shark watching sa wala pa ang paghasi sa coronavirus disease, ug gisegihan nila og pagpamaayo aron mahimo kining kasaligan nga tinubdan sa kapanginabuhi-an samtang gitun-an ang mga paagi nga mamahimo kining balanse kon hisgutan ang malungtaron nga kalikopan ug ang pahinguhaan sa turismo nga pag-ugmad.

Gipadayag sa mayor ang panglantaw sa lungsod sa whale shark watching sa higayon nga buksan na ang ekonomiya.

"Nianang panahona, mobalik na usab og sulbong ang ekonomiya, mao nga karon pa lamang, nakigsabut na kita sa mga tourism agencies aron ilang ikaapil sa ilang tanyag ang nag–una nga pangturismong kalihukan sa Lila," taho sa mayor.

"Gawas pa niana, atoa na nga giandam ang mga kababayen-an sa lungsod aron makahimo sila og mga produkto nga hinimo sa local nga materyales sa tabang sa Department of Trade and Industry ug sa Department of Labor, aron usab kita makatabang sa atong mga sector nga nabiyaan ug nagkuwang sa tabang," dugang sa abogadong mayor.

"Sa mga mananagat usab nga moapil sa kalihukan, ato na sila nga gibansay sa saktong pamaagi sa luwas nga pagganoy sa mga turista paduol sa mga whale sharks, unsaon pagdumala sa mga turista nga local ug langyaw ug pagdumala sa mga gagmay nga pundok nga mosinati sa butanding," dayag sa mayor.

Ang Lila gisaway kaniadtong pagbukas nila sa pangturismo nga kalihukan sa pagsinati sa mga butanding tungod sa gitaho nga paghatag niinig pagkaon sa mga ihalas nga mananap sa dagat nga mahimong kinaingnan sa pagsalig na hinuon sa lawog, ug dili na mobiya pa sa lugar nga may pagkaon.

Ang pagpundok sa mga butanding sa usa ka lugar ug pagkaanad niini sa tawo sinugdanan na sa pagka-angol sa mga ihalas nga mananap nga maigo sa sabad ug pala sa mga bangka, kasayon niini nga pilakon ug ang posibilidad sa pagkapuo sa species kay dili na kini makapasanay, nga kasagaran mahitabo kon anaa sila sa ihalas nga kalikopan.

Matud sa mayor, gihimoan na nila og mga lakang aron mamahimong sustenable kining ilang kalihukan.

Subay usab niini, nanawagan ang lungsod sa Kagamhanang Probinsyal, nga unta magsama siya nga us aka amahan nga moagak sa lungsod aron makab-ut niini ang buot nga abton, ug unta hatagan kini sa kaugalingnan nga itanyag sa ginikanan sa usa ka anak nga modako nga may pagsalig sa kaugalingon, bisan pa sa limitado niini nga kahinguhaan. (rahchiu/PIA-7/Bohol)

PANAWAGAN PA PAGPAKIGHIUSA. Nanawagan si Lila Mayor Arturo Piollo ngadto sa Kagamhanang Probinsyal sa paggiya sa lungsod aron makab-ut niini ang buot abton ug hatagan kini sa kugalingnan nga mamahimong makasalig na sa kaugalingon aron motubo nga lig-on ug kasaligan nga ekonomiya sa Bohol. (PIA Bohol)