Mass testing, granular lockdowns

Kritikal sa pagkontrolar sa sakit

TAGBILARAN CITY, Bohol June 14 (PIA) – Kritikal ang lakang sa syudad sa Tagbilaran sa mass testing ug ang granular lockdowns aron dali nga mapakontrolar ang pagkatag sa sakit.

Kini maoy gipaambit ni City mayor John Geesnell Yap II atul sa pagkahimo niini nga guest sa Network Briefing Hunyo 14 nga mabati sa Radyo Pilipinas ug gisibya sa mga channels nga iya sa kagamhanan.

Sa lugar nga sama sa yudad sa Tagbilaran nga nagsikitsikit na ang mga balay, ang pagpahigayon og lockdown sa mga balay nga adunay gidudahan nga nasakit sa coronavirus disease ug ang pagpahigayon sa mass testing sa first ug second generation contacts, kritikal nga lakang pagseguro nga dili makatabaok ang sakit sa uban nga panimalay, saysay sa mayor.

Sa higayon nga may magpositibo sa mga naa niini, matud sa mayor, direkta kining ihatud ngadto sa mga isolation facilities sa syudad alang sa tukmang pag-atiman ug pagmonitor.

Ug aron dili dali masudlan sa sakit ang syudad nga padayong naningkamot sa pagkontrolar sa dugang pagkuyanap sa sakit, hugot usab niining gipatuman ang pagpangayo sa negatibo nga resulta sa COVID sa testing nga giproseso sa Reverse Transcription Polymerase Chain Reaction.

Dugang sa mayor, kinahanglang dili molapas sa 72 ka oras ang resulta nga ipakita.

Sa sama nga pamaagi, mangayo pa gihapon ang mga tinugyanan sa syudad sa Certificate of Confirmation nga gipirmahan sa Kapitan, Konsehal sa Barangay nga pangulo sa Health Committee ug sa Barangay health and Emergency Response Team, aron makauli ang nahisgutang returning residents. (rahchiu/PIA-7/Bohol)