Tagb IT Hub dako og ikatabang

sa local nga ekonomiya- BabaYap

TAGBILARAN CITY, Bohol June 14 (PIA) – Milaum si Mayor John Geesnell Yap II nga makahatag og daku nga abag ang pag-aprobar sa Information Technology (IT) Hub sulod sa 1.3 ektaryas nga luna dinhi sa Tagbilaran.

Si Mayor Yap, kinsa maoy guest sa Network Briefing nga gidumala ni Assistant Secretary Jayvee Arcena didto sa Radyo Pilipinas mibutyag sa dako nga tabang sa IT Hub dinhi, sumala sa iya na nga nakita nga kalig-on sa industriya bisan pa man sa pandemya.

Matud sa batan-on nga mayor, iya na nga daan nga damgo sa iyang pagsugod og lingkod, nga makapahimutang dinhi sa syudad sa IT hub tungod sa kado nga kahigayunang pang ekonomiya nga dala niini.

Una na usab nga gidayeg sa mayor ang paningkamot sa mga pangulo sa Tagbilaran Uptown IT Hub aron makakuha sila sa pagtugot sa Philippine Export Processing Zone (PEZA) sa nahisgutang IT Hub.

Milaum si mayor Yap, nga ang IT Hub dinhi, makahatag og kaayohan, dili lamang sa mga mamumuhunan, apan usab sa mga libo-an ka mga trabahante nga makasulod niini.

Kahinumduman nga ang kadaghanan sa mga taga Tagbilaran nga nagsalig sa pangturismong kalihukan, nawad-an sa kapanginabuhi-an sa pag-atake sa pandemya.

Apan bisan pa, nagpabiling naglihok ang Business Process Outsourcing nga nag-agak sa mga taga syudad nga may makapyotan nga panginabuhi-an sa panahon sa kalisud.

Sulod sa nahisgutang IT Park, ang magtukod pa og mga call center dinhi, makadawat sa fiscal ug nonfiscal incentives sama sa 5% gross income tax, zero value added tax ug special working visa sa mga langyaw nga magtrabaho dinhi. (rahchiu/PIA-7/Bohol)