Mga hinungdan sa pagduhaduha sa pagpabakuna

batok sa COVID-19 base sa survey sa DOH

TAGBILARAN CITY, June 1 (PIA)--Giusa-usa sa Department of Health (DOH) ang nag-unang mga hinungdan sa vaccine hesitancy o pagduhaduha sa bakuna sa COVID-19 sa ubang mga Pinoy.

Matud pa ni DOH Usec. Maria Rosario Vergeire nga base sa gipahigayong survey sa DOH, nag-una sa hinugdan mao ang paghuna-huna sa mga Filipino sa mahimong side effects sa COVID-19 vaccines.

Pagbutyag pa ni Vergeire nga sa 43,000 ka adult participants sa maong survey, ikaduhang hinungdan mao ang mga nabasang sayop nga impormasyon o fake news sa social media.

Samtang ikatulong hinungdan mao ang pagduda sa ka-epektibo sa bakuna.

Tungod niini, miingon ang opisyal sa DOH nga angay magbaton og halapad nga information dissemination ang mga Pinoy aron mawala ang ilang mga kahadlok sa bakuna.

Matud pa ni Vergeire nga mao kini ang hinungdan nga gipagawas ug gipasulti ang mga eksperto aron ipasabot ang safety ug efficacy sa mga bakuna ug ipasabot ang mga adverse event.

Dugang pa ni Vergeire, nagpahigayon og naa sa 75 ka townhall meetings ang gobyerno aron ma-awhag ang publiko nga ang COVID-19 vaccines luwas sa kinatibuk-an.

Giingong wala pa usab natala nga bisan unsang seryosong post-vaccination event sama sa pagkamatay.

Sa pagkakaron, nakabakuna na sa nasod og 150,000 ka indibidwal matag adlaw, base sa pahayag ni vaccine czar Carlito Galvez Jr. (ecb/PIA7-Bohol)

EKSPERTO BATOK TINUMOTUMO. Gipagadan ang kampanya karon sa kagamhanan nga pagpasulti sa mga eksperto ug mga gitahud sa katilingban kabahin sa bakuna ug ilang kasinati-an aron puhagon ang kahadlok sa katawhan sa pagpabakuna nga nagsugod sa kahadlok sa side effects. (PIA Bohol/DOH)