Unang batch sa mga Bol-anong centenarian

gitakdang makadawat og P100K matag usa

TAGBILARAN CITY, June 1 (PIA)--Gitakdang makadawat og tag-P100,000 matag usa ang unom sa unang batch sa mga centenarians nga benepisyaryo sa probinsiyal nga kagamhanan nga cash aid ngadto sa mga mag-edad og 100 anyos pataas.

Matud pa ni Bise Gobernador Rene Relampagos, ang maong cash aid nga ihatag sa probinsyal nga kagamhanan kuhaon gikan sa annual budget niini.

Ang probinsyal nga kagamhanan pinaagi sa usa ka ordinansa nga gipalabang sa Sangguniang Panlalawigan (SP) sa niaging tuig, nagmugna sa Bohol Centenarian Committee nga maoy mo-ila ug mo-asses sa mga kwalipikadong makadawat niining cash aid.

Kining programa gi-implementar pinaagi sa Provincial Social Welfare and Development Office (PSWDO).

Matud pa ni Relampagos nga sa inisyal nga unang batch, ang makadawat mao sila Toribia Saludes – 101 anyos taga Sacaon, lungsod sa Garcia Hernandez; Julian Selma Sr. – 101 anyos sa Sagbayan Sur, lungsod sa Sagbayan; Teologo Curiba – 100 anyos sa Mahagbu, lungsod sa Trinidad; Aurelia Daleon – 100 anyos sa Anoyon, lungsod sa Valencia; Feliciana Paas – 100 anyos sa Cansumbol, lungsod sa Bilar; ug Veronica Quim – 100 anyos sa Taug, lungsod sa Lila.

Gibutyag sa Bise Gobernador nga tulo pa ka batch sa mga 50 ka indibidwal ang gipaabot nga makadawat usab sa maong cash aid sa mga mosunod nga semana.

Niadtong Martes sa niaging semana, Mayo 25, ang SP nipalabang og resolusyon nga pormal nga nag-ila sa mga centenarians sa lalawigan sa Bohol.

Gipasabot ni Relampagos nga ang mga centenarians kwalipikado nga makadawat og hinabang gikan sa probisyal nga kagamhanan bisan makadawat usab sila og P100,000 gikan sa nasudnong kagamhanan nga ihatag niini sa mga tigulang nga mag-edad og 100 anyos pataas. (ecb/PIA7-Bohol)