Mga turistang mangpeke og COVID-19

test, siguradong mabilanggo – PRRD

TAGBILARAN CITY, June 15 (PIA)--Nipasidaan si Presidente Rodrigo Roa Duterte sa mga turista o byahero batok sa pagpakita o pagprisintar og peke nga negatibong resulta sa COVID-19 test ilabi na sa mga tourist spots sa nasod.

Sa iyang Talk to the People niadtong Lunes sa gabii, Hunyo 14, gimanduan ni Presidente Duterte ang Philippine National Police (PNP), Department of Tourism (DOT) ug tanang local government units (LGUs) nga arestuhon ang mga magpakita og peke nga negatibong resulta sa COVID-19 test ug magpatuman sa hugot nga pagsunod sa protocols sa local tourism.

“Arrest those presenting fake tests and enforce strict compliance of protocols of local tourist,” matud pa ni Duterte.

Giingnan usab sa Presidente ang mga hingtungdang ahensya sa gobyerno nga dili mahadlok nga pahamtangan og silot ang mga indibidwal nga masakpang nameke og COVID-19 tests.

Una nang namahayag ang PNP nga ang mga masakpang mangpeke og COVID-19 tests mag-atubang sa falsification of public documents ug paglapas sa Mandatory Reporting of Notifiable Diseases and Health Events of Public Health Concern Act.

May multa nga P50,000 ug pagkabilanggo og di moubos sa usa ka buwan apan dili molapas sa unom ka buwan ang mga masakpang mangpeke og COVID-19 test results.

Nakalatid sa balaod nga ang “tampering of records relating to notifiable diseases or health events of public health concern, which includes official medical test results or medical certificates, or such other documents and records issued by public health authorities is punishable by law.” (ecb/PIA7-Bohol)

Sa iyang Talk to the People niadtong Lunes sa gabii, gimanduan ni Presidente Duterte ang PNP, DOT ug tanang local government units nga arestuhon ang mga magpakita og peke nga negatibong resulta sa COVID-19 test ug magpatuman sa hugot nga pagsunod sa protocols sa local tourism. (PCOO)