Kapin 5,000 tourism workers sa Bohol,

gitakdang bakunahan batok COVID-19

TAGBILARAN CITY, June 15 (PIA)--Gipahayag sa Department of Tourism (DOT) nga kapin sa 5,000 tourism workers sa Bohol ang gitakdang bakunahan batok sa COVID-19 human gidugangan sa gobyerno ang suplay sa bakuna alang sa lalawigan.

“I am delighted to bring the good news that vaccine czars Sec. Carlito Galvez and Sec. Vince Dizon have approved our request for additional vaccines for Bohol,” matud pa ni DOT Kalihim Bernadette Romulo-Puyat atol sa gipahigayong Virtual Tourism Stakeholders Forum nga gitambongan sa mga lokal nga hingtungdan sa turismo sa lalawigan ug ni Gob. Arthur Yap niadtong Lunes, Hunyo 14.

Matud pa ni Puyat nga posibleng moabot sa Bohol karong semanaha ang 10,000 doses sa Sputnik V vaccine sa Russia.

Igahin ang 10,000 Sputnik V vaccine sa 5,000 tourism workers sa lalawigan.

Giingong pinaagi niini, masigurong may proteksyon batok sa makatakod nga sakit ang mga frontliner sa mga accredited nga hotel ug resort, transport operator, tour site, ug restaurant facilities.

“With this, the industry’s frontliners can start preparing for a bigger reopening of tourism in the coming days,” matud pa ni Puyat.

Gibutyag sa kalihim nga ang vaccination drive alang sa mga trabahante sa sektor sa turismo maghatag og dalan alang sa lalawigan sa Bohol sa pagsugod niini sa pagpangandam alang sa pagbukas sa “Green Lane.”

Ang “Green Lane” usa ka inisyatiba sa DOT nga nagtinguha sa pagpasayon sa pagsulod sa mga langyaw nga bisita nga naka-kumpleto na sa bakuna batok sa COVID-19 nga wala na nanginahanglan o mas mub-an nga quarantine.

Apan kining programa gipahiluna pa diin ang DOT nagtinguha sa paghimo og mga lakang sa pag-authenticate sa mga mangabot nga gikan sa nagkalain-laing nasod. (ecb/PIA7-Bohol)