Mga eksaminasyon sa PRC,

gitugotan sa IATF, apan…

TAGBILARAN CITY, Bohol June 9 (PIA) – Aprobado na sa Inter-Agency Task Force on the management of Emerging Infectious Disease (IATG) Technical Working Group ang hangyo sa Professional Regulation Commission (PRC) nga makabalik na sila og pasiugda sa ilang professional licensure examinations gikan sa Hulyo ngadto sa Septembre.

Kini ang kasayuran nga nasukip sa IAFT Resolution 119, series of 2021, nga gipagawas sa IATF niadtong Hunyo 3, 2021.

Hinuon, gipasabut sa IATF nga ang pag-tugot, magdepende usab sa tulo ka butang.

Una, kinahanglang ipaubos sa estrikto nga pagmonitor ang pagtamud ug pagsubay sa minimum public health standards ug safety protocols sa PRC.

Ikaduha, magdepende sa pagpagawas sa PRC-Department of Health ug PNP sa hiniusang guidelines alang niini.

Ikatulo, kini usab magdepende sa matang sa community quarantine nga nagpandong sa mga local nga kahamnanan, lalawigan ug highly urbanized centers ug independent chartered cities diin ipahigayon ang mga licensure examinations.

Subay niini, giawhag sa IATF ang PRC nga magduso sa listahan sa mga lugar ug petsa sa mga eksaminasyon ngadto sa Metropolitan Manila Development Authority ug sa PNP Joint Task Force COVID Shield alang sa tukmang pagladlad sa mga gikinahanglang mga kapolisan ug opisyal kinsa maoy makatabang sa pagdumala sa luwas ug hapsay nga pagpahigayon sa eksaminasyon. (rahchiu/PIA-7/Bohol)