Tagbilaran, misagop sa

sa S-PASS alang sa RRs

TAGBILARAN CITY, Bohol June 11 (PIA) – Subay sa lagda sa nasudnong kagamhanan nga nagdumala sa pagpapauli sa mga residente o returning residents (RRs) niining panahon sa pandemya, gipatuman sa syudad sa Tagbilaran ang pagparehistro sa mga manguli-ay, ngadto sa S-Pass.

Ang S Pass, usa sa sistema nga giugmad sa Department of Science and Technology (DOST) alang saluwas, paspas ug inutok nga pagpadagan sa mga tawo tabok sa mga lugar sa local nga may kwarantina, taliwala sa mga nagkadaiyang sumbanan nga gisagop sa mga local nga kagamhanan nga nagtubag sa krisis.

Ang S Pass suportado sa Philippine National Police, Department of National Defense, Department of Interior and Local Government ug sa DOST.

Ang S-Pass usab magtanyag sa publiko nga nagabyahe sa kasayuran kabahin sa mga lagda sa pagbyahe ngadto sa mga lugar nga nagpatuman sa lahi-lahi nga pamaagi sa pagdawat sa mga mosulod didto.

Isip sistema sa pagdumala sa pagbyahe, pinaagi sa pagparehistro sa s-pass.ph, makit-an sa mobyahe kon unsa nay rekisitos sa mga pagsulod sa lugar nga buot niya nga adtoan.

Pananglit, kon ang lugar nga bisitahon o uli-an, adunay pinugngan nga palisiya, Makita kini didto sa s-pass.ph ug makaaplay dayun ang mobyahe sa Travel Coordination Permit (TCP) pinaagi sa S-PaSS, nga mao nay hulip sa una na nga gipangayo nga Travel Authority.

Sa laing bahin, kon ang lugar ng adto-an, walay gipangayo nga rekisitos, apan sa pagbyahe, mo-agi sa mga lugar nga adunay pinugngan nga pagsulod, pinaagi sa S-pass, maka-aplay ang mobyahe sa Travel Pass-Through Permit (TPP).

Sa syudad sa Tagbilaran, subay sa s-pass, anaa nay upat ka gikinahanglang buhaton aron makasulod dinhi.

Una niini, ang mobyahe pauli o mosulod sa syudad gikan sa gawas sa Bohol kinahanglang nga makakuha sa Barangay Certification gikan sa barangay nga sudlan dinhi sa Tagbilaran.

Ang Barangay Certification kinahanglan adunay tulo ka pirma, alang sa tukmang monitoring. Kini pirmahan sa Barangay Chairman, Chairman sa Committee on Health ug BHERTS.

Ikaduha, kinahanglan ang mosulod nga ipa-swab ug ipaproseso kini pinaagi sa RT-PCR o Saliva RT PCR didto sa pasilidad nga accredited sa DOH.

Ang negative nga resulta sa COVID test pinaagi niing nahisgutang proseso kinahanglang moabut og 72 oras, ug gipagawas sa lugar diin mosakay sa barko o eroplano ang mobyahe.

(Ang 72 oras magsugod og ihap human og kuha sa swab, pananglitan kon giswab o gala 1:00 sa Mayo 17, ang resulta niini magamit hangtud sa Mayo 20 sa ala 1:00 sa palis lamang. DIli magamit ang tanan nga mga resulta sa Rapid Antigen test.

Ikatulo, mao ang pagparehistro ug pagbaton og aprobado nga S-Pass pinaagi sa pagrehistro sa S-PASS.PH pinaagi sa online, aron kon ugaling sa pagbyahe, mohapit sa mga lugar nga may hugot nga palisiya sa pagpasulod, makakuha ka kini sa Travel Pass thru permit

Kon kompleto na ang requirements 1-3, ipadala kini nga mga dokumento sa facebook page sa RETURNING RESIDENTS TAGBILARAN, aron mahatagan ka na sa Confirmation Letter.

Kon kompleto lamang ug walay suliran sa mga papeles, makuha na dayon ang Confirmation Letter, segun pa sa syudad. (rahchiu/PIA-7/Bohol)