PPA mosugod nag dredge

Sa Clarin municipal port

TAGBILARAN CITY, June 16 (PIA) – Gitubag na sa Philippine Ports Authority (PPA) ang hangyo sa Sangguniang Bayan sa Clarin gipangulohan ni Bise Mayor Allen Ray Piezas sa paghimo sa pagpalawom sa kadagatan sa pantalan aron kadungguan kini sa mas dagkong barko.

Kini human gipadala sa sa PPA ang usa ka barko nga maoy mohimo sa dredging agi og tubag sa municipal resolution ngadto sa PPA nga e-apil ang municipal port sa Clarin sa ilang dredging project.

Sa gepasa nilang Municipal Resolution no. 080 series of 2018 ngadto sa PPA, mihangyo ang Clarin nga maapil nga mapalapdan ang pantalan aron madungagan og mga dagkong barko nga modunggoi dinhi.

Kini tungod kay kon magamit ang pantalan sa fastcraft operations, mas maluag ang pantalan sa Tubigon, makapahimulos ang lungsod sa turismo ug makapa-ugmad sa pagpalambo sa local nga ekonomiya.

Gani, matud pa sa resolusyon, may tumong na ang usa ka shipping company sa paghimo sa pantalan sa Clarin isip regular nga port of call.

Kon kini maaprobahan, maghatag kini og tabang sa ekonomiya sa Clarin ug mapalambo ang marine industry sa lungsod, matud sa Bise Mayor.

Karon lang nila napatuman ang maong plano tungod sa pandemya ug sakto usab nga dungan usab nga gitrabaho ang mga pantalan sa lungsod sa Loay ug Tagbilaran City. (John Paul Elicano/PIABohol Intern)