Bohol, abag sa Canada, bansayon

Sa climate ug Disaster resilience

TAGBILARAN CITY, Bohol (PIA)—Usa ang Bohol sa unom ka mga lalawigan sa Pilipinas nga unang patumanan sa innovative nga Governance for Climate and Disaster Resilience (Gov-CDR) nga gipundohan sa nasud sa Canada pinaagi sa ilang Global Affairs Canada.

Kini human gitug-an sa Alinea International nga ang Bohol usa sa mga gipili nga lalawigan nga diin ipatuman ang unom ka tuig nga proyekto nga maggahum sa mga komunidad nga pamaayohon pa ang ilang pagtimbang timbang sa mga risgo sa katalagman ug natural nga mga hazards nga anaa sa ilang lugar.

Gawas pa niini, pinaagi sa proyekto, ang mismong mga komunidad nga nagamhan, mao nay mohimo sa mga lakang aron pamenoson ang epekto sa kakuyaw, pangandaman kini og hatagan sa tukmang aksyon aron malikayan ang pagkadaut sa kinabuhi ug kabtangan.

Lakip na usab sa technical assistance nga ihatag sa proyekto mao ang paghipno sa mga pamaagi sa pagpahiuli ug pagpatunhay sa komunidad labang sa makadaut nga mga epekto sa nagkausab nga panahon.

Mahimo kini pinaagi sa pagtabang sa Alinea International sa Bohol ug mga komunidad sa Local Government Units, national Government Agencies sama Department of Interior and Local government ug Department of Environment and Natural Resources alang niining mga katuyuan sa tabang.

Ang Gov CDR gipatuman usab sa Kalinga, Aklan, Davao de Oro, Samar ug Bukidnon.

Gilagdaan ni Gob Erico Aristotle Aumentado sa Bohol ug ni Alinea International Country Project Manager Edgardo Catalan uban usab ni Bohol PDRRMO Anthony Damalerio samtang gisaksihan ni Ambassador David Hartman ang paglagda sa Memorandum of Agreement kabahin niini.

Mipadayag usab sa ilang suporta ang mga tinugyanan sa DENR pinaagi ni Regional exec Director Paquita Mellijor ug DILG Regional Director Leocadio Trovela pinaagi ni Provincial Director Jerome Gonzales ug Francis Bernard Batoy sa Bohol People’s Council. (PIABohol)