Titulo sa mga yuta sa Eskaya

Mogawasay na, niining tuiga

TAGBILARAN CITY, Bohol (PIA)—Usa ka hiniusang titulo sa yuta nga iya sa kinatibuk-an kaliwatan sa mag Eskaya ang sa dili madugay, ikahatag na gayud, saysay ni National Commission on Indigenous People’s (NCIP) Bohol Field Officer Emmilou Gonzaga didto sa Kapihan sa PIA.

KIni, kay human sa 17 na ka tuig nga pinaabutay sa mga sakop sa kaliwatan sa Eskaya nga nanimuyo sa mga bukiran nga bahin sa Duero, Guindulman, Sierra Bullones ug Pilar, mapagawas na sa NCIP en banc ang sertipiko sa kagamhanan nga nagtagad sa ilang pag-angkon sa kayutaan sa ilang mga katiguwangan.

Subay sa Indigenous People’s Rights Act (IPRA), ang mga Eskaya, kay naapil sila sa natagad sa goberno nga may karaan na nga linyada sa mga katiguwangan nga nanginabuhi sa kabukiran sa mga nahisgutang lungsod, mahimo sala nga moangkon sa mga kayutaan isip kabahin sa ilang mga ancestral domains o mga kayutaan nga giangkon na sa ilang mga katiguwangan.

Usa ka hiniusan nga titulo ang ipagawas sa goberno aron pagpamatuod nga opisyal na nga gigunitan sa mga Eskaya ang kamatuoran nga ilaha na og walay laing dili sakop sa pundok ang makapanag-iya sa nahisgutang yuta.

Matud ni Gonzaga, 2017 pa diha nga pormal nga giduso sa Eskaya, inabangan sa NCIP ang pag-angkon sa mga katuyaan sa ilang mga katiguwangan.

Pinaagi sa pagpagawas sa goberno sa Certificate of Ancestral Domain Claim niadtong 2017, gimandu usab sa gobernor nga hiusahon ang mga yuta nga gi-angkon sa mga sakop sa Eskaya ug sa nahiapil sa opisyal nga sukod nga gihimo sa Department of Environment and Natural Resources (DENR).

Niadtong Marso 27, gitagad na usab sa goberno ang giduso sa Eskaya nga giangkon nga mga kayutaan, ug sunod niini, ang 3,106 hectaryas nga naapil sa giangkon sa Eskaya, iduso na ngadto sa Land Registration Authority aron mahimo na kin inga patitulohan.

Dayag ni Gonzaga, mahimong sa dili pa motapos ang tuig, makagawas na ang titulo sa kapin sa 3 mil ektaryas nga dili na gyud mailog gikan sa mga Eskaya. (PIABohol)

DOKUMENTADO NGA IYA SA MGA ESKAYA. Gipakita sa tribal leader sa mga Eskaya ang Certificate of Recognition of Ancestral Domain Claim (CRADC) isip kasulatan nga iduso na alang sa registration and 3,106 ektaryas nga gipanag-iya sa mga Eskaya aron kathimoan na og titulo. (PIABohol)