Mga mag-uuma sa Pilar nakadawat

sa ilang fertilizer discount voucher

TAGBILARAN CITY, Bohol (PIA)--Ang mga mag-uuma sa lungsod sa Pilar nakadawat na sa ilang fertilizer discount voucher (FDV) alang sa inorganic fertilizers, soil ameliorants ug bio-fertilizers, isip kabahin sa suporta sa Department of Agriculture (DA) aron mapalambo ang produksyon sa agrikultura sa mga mag-uuma.

Mokabat sa 2,928 ka mga mag-uuma sa humay sa maong lungsod ang nakadawat og inorganic fertilizers nga nagkantidad og P9,333,710.26, samtang 2,864 ka rice beneficiaries ang nakadawat og soil ameliorant nga mokabat sa P2,674,243.50.

Sa biofert, 2,222 ka rice farmers usab ang nakadawat nga nagkantidad og P3,283,418.85.

Ang mga kwalipikadong rice farmer beneficiaries narehistro sa Registry System for Basic Sectors in Agriculture (RSBSA).

Kini ang nagdeterminar sa gidaghanon sa mga abono nga i-subsidize base sa gidak-on sa umahan.

Sa usa ka pakighinabi, ang presidente sa Cove Irrigators Association nga si Mapacsalan Modesto B. Tagaro Jr. nipadayag sa iyang pasalamat sa gobyerno sa ilang padayon nga suporta.

“Isip presidente sa asosasyon, dako ang among pasalamat sa nadawat nga tabang ug suporta nga dako kaayog tabang sa among pamilya, dugang pa sa rice farmers financial assistance (RFFA) sa kantidad nga P5,000,” matud pa ni Tagaro.

Gi-awhag usab niini ang ubang mga mag-uuma nga magparehistro sa RSBSA pinaagi sa ilang tagsa-tagsa ka Municipal Agriculture Office (MAO). (ecb/PIA7-Bohol)

Isip kabahin sa suporta sa DA, nanghatag sila og fertilizer discount voucher (FDV) alang sa inorganic fertilizers, soil ameliorants ug bio-fertilizers aron mapalambo ang produksyon sa agrikultura sa mga mag-uuma. (DA photo)