DepEd: Walay dugang tuig alang sa senior high school

TAGBILARAN CITY, Bohol (PIA)--Ang usa ka Facebook post nga nagpahibalo nga adunay dugang nga Grade 13 sa senior high school alang sa school year 2025-2026 dili tinuod, sumala sa Department of Education (DepEd).

Ang pagklaro gihimo sa DepEd sa mensahe sa Viber ngadto sa mga tigbalita niadtong Domingo.

Ang makapahisalaag nga impormasyon gi-post sa usa ka pahina sa Facebook nga giulohan og “Educational News.”

Gipakita niini ang litrato nga adunay mga logo sa Commission on Higher Education ug DepEd, kauban ang teksto nga nag-ingon nga adunay Grade 13 sa school year 2025–2026.

“ANNOUNCEMENT! Please Share! To all Parents and students take time to read, additional one year for Senior High School, this is… See more,” mabasa sa caption.

Ang post usab adunay mga link nga nagdirekta sa mga tiggamit sa usa ka online shopping website.

Gipahinumdoman sa DepEd ang publiko nga magmabinantayon ug mahimong kritikal batok sa sayop nga impormasyon.

Alang sa opisyal nga mga anunsyo ug impormasyon kalabot sa batakang edukasyon, gi-awhag ang publiko nga bisitahon lamang ang opisyal nga DepEd Philippines social media accounts. (ECB/PIA7-Bohol)

Gipanghimakak sa DepEd ang nikatap nga Facebook post kalabot sa giingong pagdugang sa Grade 13 sa Senior High School alang sa school year (SY) 2025-2026. (DepEd/PIA)