Rice field day ug harvest festival sa 100 ka ektaryang

humayan nga nagsagop sa ABFS, gipahigayon

TAGBILARAN CITY, Bohol (PIA)--Gipahigayon ang field day ug harvest festival sa 100 ka ektarya nga rice model farm nga nagsagop sa balanced fertilization strategy (BFS) ubos sa Department of Agriculture-Bureau of Soils and Water Management (DA-BSWM) uban sa DA-Central Visayas niadtong Mayo 14, 2025 sa Barangay Gabi, lungsod sa Ubay.

Ang modelo nga umahan nagpakita sa teknolohiya sa Adaptive Balanced Fertilization Strategy (ABFS), nga naglangkob sa mga barangay sa Gabi, Governor Boyles, ug Lumangog.

Ang ABFS usa ka component sa National Soil Health Program (NSHP) ubos sa DA-BSWM, nga usa ka science-based farming approach nga nag-integrate sa organic ug inorganic fertilizers, tungod kay kini nagtubag sa espesipikong nutrient nga panginahanglan sa mga tanom ug yuta, nga miresulta sa pagpalambo sa kahimsog sa yuta, dugang nga produktibidad, ug malungtarong mga pamaagi sa pagpanguma.

Si DA7 Regional Executive Director Angel C. Enriquez, sa iyang mensahe, midasig sa mga mag-uuma sa pagsagop sa mga teknolohiya ug pagpaambit sa ilang mga nakat-onan sa ubang mga mag-uuma gikan sa ubang mga lungsod.

Gihagit usab niini si Roman Dabalos, ang DA7 APCO Bohol ug ang rice program implementer sa pagsundog ug pagpatuman sa ABFS sa ubang mga lungsod sa probinsya sa Bohol.

Gibutyag ni Leolito D. Siase, DA-BSWM Supervising Science Research Specialist nga sa wala pa ang pagsagop sa ABFS alang sa 2024 Dry Season (DS), pipila ka mga miyembro sa GBL Irrigators Association adunay average nga ani nga 3.18 tonelada/ektarya. Human sa pagsagop sa ABFS, ang ilang kasagarang abot misaka ngadto sa 4. 52 tonelada/ektarya.

Base sa crop cut data, kini nagpadayag sa mahinungdanong pag-uswag sa abot sa mga lugar sa humay diin gipatuman ang ABFS, diin, alang sa upstream nga mga dapit, nagpakita kini og ani nga 5.92 tonelada/ektarya, ang midstream nga mga dapit naghatag og abot nga 7.20 ka tonelada/ektarya, samtang ang downstream naghatag og 6.12 ka tonelada/ektarya.

Si Elizabeth M. Curiba, usa ka 47-anyos nga miyembro sa GBL Irrigators Association nga adunay 15 ka tuig nga kasinatian sa pag-uma sa humay, mipaambit sa iyang mga kasinatian sa pagsagop sa Balanced Fertilization Strategy.

“Gisunod namo ang pamaagi ug mga protocol sa ABFS, ug nindot kaayo ang resulta kay nagtugma kini sa eksaktong gidaghanon sa abot. Sa akong usa ka ektarya, nakaabot kini og 5.5 t/ha. Nalipay ko kay epektibo ang mga estratehiyang ilang gitudlo,” matud pa ni Curiba.

Gipasabot usab niini kung giunsa ang iyang pagsalig kaniadto sa dili organikong mga abono nahimong mahal ug dili mapadayon.

“Kaniadto, magsige lang ko’g gamit og inorganic fertilizer. Sa akong naobserbahan, sa sige nako’g gamit niini (inorganic), magkataas ug magkataas ang kinahanglan nga input kada ektarya. Nagsugod kog apply og 10 ka sako, dayon nahimong 12, hangtod niabot og 14 ka sako kada ektarya. Dako kaayo ang gastos, pero ang abot pareho ra gihapon. Karon nga among gigamit ang estratehiya nga gihatag sa BSWM, mas nidako ang kadaghanon sa abot, apan mas mubo na ang gastos,” dugang pa ni Curiba.

Ang maong kalihokan nagtigom sa mga stakeholders gikan sa DA-attached agencies, lakip ang National Irrigation Administration (NIA 7), Philippine Rice Research Institute (PhilRice 7), ingon man ang mga representante gikan sa Office of the Provincial Agriculture (OPA), Municipal Agriculture Office sa Ubay, ug GBL Irrigators Association Inc. (ECB/PIA7-Bohol)

Ang field day ug harvest festival sa 100 ka ektarya nga rice model farm nga nagsagop sa balanced fertilization strategy (BFS) sa Department of Agriculture-Bureau of Soils and Water Management (DA-BSWM) uban sa DA-Central Visayas nga gipahigayon sa Barangay Gabi, lungsod sa Ubay niadtong Mayo 14, 2025. (DA-7 photo)