Batan-ong trabahante gipahait
Ang katakus nga mangtrabaho

TAGBILARAN CITY , Bohol (PIA)—Sa kritikal nga tabang niini sa pagmugna og mga Bol-anon nga mga trabahante nga may katakus sa pagpanday sa mas lig-on nga ekonomiya, gidayeg ni Gob Erico Aristotle Aumentado ang programa nag Jobstart Skills training nga mitapos niining bag-o pa lamang.

Ngadto sa 110 ka mga benepisaryo nga mingtapos sa 10 ka adlaw nga bansaybansay, giaghat ni Aumentado nga gamiton ang natun-an samtang buksan permi anbg hunahuna sa daghang mga kahigayunan nga mopatim-aw.

“Ayaw og duhaduha nga gukdon ang inyong mga pangandoy, ispa ang mga hagit nga maoy mas magpalig-on pa kaninyo ug ayaw kahadlok moatubang sa kalibutan,” kini maoy aghat sa govbernador sa mga mingtapos sa programa naghatag sa mahinungdanong entablado sa pagpahait pa sa mga kapasidad sa mga batan-ong trabahante aron mas mahimong mas maayong molupyo nga matudlo-an sa dugang mga katakus.

Usa ka programa sa tinabangay sa Department of Labor and Employment ug sa Bohol Employment and Placement Office aron palig-onon pa ang strategic nga tumong sa Administrasyon nga hatagn og dugang pang mga oportunidad ug mga katakus ang kabatan-onan nga mahimong hanas sa trabaho, ang Jobstart program nagpalig-on sa mga Bol-anon nga motunhay sa daghang nagkalapad nga hagit sa pagpanarbaho.

Ubos sa liderato ni Aumentado, nagpadayon ang Kapitolyo sa pagpatuman sa mga inisyatiba nga maghatag og gahum sa mga katawhan pinaagi sa pagpahanas sa katakus ug pagpabukas sa mga programa nga magpa-andam sa mga katawhan sa pagpanarbaho.

“Kamo ang mga produkto sa makahuloganon nga pagtinabangay sa Bohol pinaagi sa BEPO ug sa DOLE, mapasigarbohon kami kaninyo,” sulti sa gobernador.

Karon nga anaa na diha kaninyo ang katakus nga himoong mas progresibo ang ekonomiya, dad-a ang maayong handumanan ug mga pagtulon-an nga inyong nakuha sa JObstart Training ug kini maoy himooang giya pag tadlas sa dalang ngadto sa kalampusan, aghat usab niya.

Ang pagtapos sa training gipasundan usab dayon sa job fair aron may dinali-an nga tanyag kapanarbahoan ang mga nabansay.

Didto ang Ibex Bohol, Sagility, Du Ek Sam Inc., Alturas Group of Companies, JJ’s Foodland Corporation, Passiflora, The Fortune Group, Bohol Beach Club, Keep Diving Scuba World, ug BODARE-MPC. (PIABohol)

ALANG SA MAS HANAS NGA TRABAHANTE. Gitapos sa BEPO-PESO sa Bohol ug sa DOLE ang 10 ka adlaw nga Jobstart Training aron mas maandam ang mga batan-ong mosulod sa mga trabaho sa katakus nga kinahanglan aron molahutay ugt makahimo og mga kausaban sa natad sa kapanarbahoan, subay sa tumong sa Administrasyon ni Gob Aumentado. (PIABohol/PIMO)