DepEd: Nipahimangno batok sa fake news

sa pagsuspenso sa klase tungod sa Mpox

TAGBILARAN CITY, Bohol (PIA)--Ang Department of Education (DepEd) niadtong Hunyo 6, nipasidaan sa publiko batok sa bakak nga post sa social media nga nag-ingon nga gisuspinde ang klase tungod sa monkeypox (Mpox) virus.

Sa opisyal nga pamahayag, gihimakak sa DepEd ang maong tsismis ug gi-awhag ang publiko nga magmabinantayon.

“Fake news ang kumakalat na social media post tungkol sa umano’y suspension of classes dahil sa MPOX virus),” matod sa ahensya.

Tungod niini, gipahinumdoman sa departamento sa edukasyon ang publiko nga ipatuman ang critical thinking kung makasugat og mga wala mapamatud-i nga kasayuran.

“Muling pinaaalalahanan ng DepEd ang publiko na mag-ingat at maging mapanuri laban sa misinformation,” dugang pahayag sa DepEd.

Aron malikayan ang kalibog ug pagkuyanap sa bakak nga balita, gidasig sa DepEd ang publiko nga mosalig lang sa mga verified sources.

Alang sa opisyal nga mga anunsyo ug impormasyon bahin sa basic education, gi-awhag sa buhatan nga bisitahon lamang ang opisyal nga DepEd Philippines social media accounts.

Niadtong Mayo 31, ang Department of Health (DOH) nipagawas og susamang pasidaan nga nag-awhag sa publiko nga dili motuo sa viral nga mga post sa Facebook nga bakak nga nag-angkon nga ipahamtang ang lockdown tungod sa Mpox.

Gipasiugda sa DOH nga ang Mpox dili airborne, ug dili kinahanglan ang mga lockdown.

Ang departamento sa kahimsog nag-ingon nga ang mga lockdown dili kinahanglan ug nipasidan-an batok sa mga post sa social media nga naggamit og mga sayup nga pag-angkon sa kahimsog o peke nga pag-endorso aron ipakaylap ang kahadlok ug kalibog. (ECB/PIA7-Bohol)

Fake news ang gipakatap nga social media post kalabot sa giingong suspension of classes tungod sa MPOX virus. (DOH/PIA)