Tanang lungsod nga may humayan

May makinarya gikan sa PhilMECH

TAGBILARAN CITY, Bohol (PIA)—Gipanaad na sa Philippine Center for Postharvest Development and Mechanization (PhilMECH) nga sa sunod nga tuig, lukpon na ang 45 ka mga kalungsuran sa Bohol sa paghatag og mga makinarya nga ikaabag sa goberno sa pagpanghumayan.

Kini maoy gipaambit ni Provincial Agriculturist Liza Quirog didto sa Kapihan sa PIA samtang gihisgutan ang pagpanghumayan ug produksyon sa humay taliwala sa pagpaneguro sa suplay sa pagkaon.

Matud ni Quirog nga sa pagsugod sa pagpakatap sa Agricultural Competitiveness Enhancement Fund (ACEF) sa 2019 ngadto sa 2024, wala ka makatunga sa mga kalungsuran sa Bohol nga may mga humayan nga nahatagan sa mga makinarya abag sa produksyon sa humay.

Sa 48 ka mga kalungsuran sa Bohol, ang Panglao, Dauis ug Tagbilaran lamang ang walay mga humayan, ug kini wala na mag-isip sa kalapdan o kadak-on sa gihisgutang gitamnan.

Ug karon 17 ngadto sa 20 pa ka mga lungsod ang unang nahatagan sa mga tractor, transplanters, combine harvesters, walk behind tractors, rice threshers, ug mga gagmay nga makinarya nga makatabang sa pag-ugmad sa basakan ug pagpataas sa kita.

Gawas sa mga kalungsuran, may mga himan sa PhilMECH ang didto usab gitagak sa mga kahugpungan sa mga mag-uuma ug irrigators association, apan may mga higayon na usab nga dili magamit ang mga ekipo kon iabut sa pagkaguba ug pagkabagat og mga problema sa maintenance, matud ni Quirog.

May mga higayon nga may nga ekipos nga dili magamit, tungod sa kakuwang sa kapasidad sa lungsod o sa kahugpungan alang sa pagpadumala sa nahisgutan nga makinarya, segun sa kasinati-ans a mga mag-uuma.

Alang niini, matud ni Quirog nga mitanyag si Gob Erico Aristotle Aumentado nga maoy modawat sa mga makinarya ug usbon ang unod sa Memorandum of Agreement aron mapasibu-an ang pamaagi sa paggamit sa mga ekipo sa mga kalungsuran nga buot mogamit niini.

“Kon nay lungsod nga maglisud pag-utilize sa farm machine, ok ang Provincial Government, ibalhin ang Memorandum of agreement,” matud ni QUirog.

Niini nga pamaagi, kon may mga suliran sa pagpadumala ang mga kahugpungan o kalungsuran, ang Kapitolyo na ang mopadagan sa mga ekipo, subay sa kasabutan niini sa Philmech.

Hinuon, sa dili madugay, milaum ang Office of the Provincial Agriculture nga ikatugyan na sa PhilMECH ang gisaad niini nga mga makinarya alang sa tanan nga mga lungsod nga nay humayan. (PIABohol)

MAS MAPADAGHAN. Sa produksyon sa humay, milaum si Provincial Agriculturist Liza Quirog nga mahatmonize na ang data sa mga ahensya sa goberno aron Makita ang matuod nga hulagway sa produksyon sa Bohol, ilabi na karon nga mas dali na ang pagpanghumayan sa teknolohiya nga magamit. (PIABohol)