Base sa labing unang pagtuon sa Pilipinas:

Pagsaka sa online sexual exploitation 

pinaagi sa livestream makaalarma

TAGBILARAN CITY, Bohol (PIA)--Ang Plan International Pilipinas niadtong Huwebes nilusad ug usa ka pioneering research study sa pagsaka sa self-facilitated livestreaming of child sexual exploitation and abuse (CSEA), usa ka dako nga nataligam-an nga porma sa online nga pag-abuso diin ang mga bata gipugos sa paghimo ug pagpaambit sa hayag nga sekswal nga content sa ilang kaugalingon.

Ang pagtuon, nga gisuportahan sa Safe Online global nga inisyatiba, mao ang una sa iyang matang sa nasud nga komprehensibo nga nagsuhid sa socio-economic, emosyonal, ug teknolohikal nga mga hinungdan nga nagtukmod sa mga bata diin nanguna ang mga babaye nga nag-edad 13 hangtod 15, sa paghimo sa ingon nga mga buhat.

Gipasiugda usab sa panukiduki kung giunsa ang kasagarang gigamit nga mga digital platform, sama sa Facebook Messenger, WhatsApp, Zoom, Discord, ug bisan ang mga dula sama sa Mobile Legends ug Blockman GO, gipahimuslan ingon mga agianan sa pag-abuso. Ang sayo nga pagkaladlad sa mga bata sa mga bastos nga content, limitado nga digital literacy, ug kakulang sa superbisyon, nagmugna og usa ka peligro nga palibot nga dali nga gipahimuslan sa mga manunukob.

Si Cathy Soco, Program Director sa Plan International Pilipinas, nagpasiugda sa panginahanglan sa koordinado ug multi-sectoral nga aksyon.

Matud pa ni Soco nga ang mga lokal nga gobyerno sama sa Bohol nanguna pinaagi sa pakigtambayayong sa mga NGOs, komunidad, ug mga ahensya sa pagpatuman aron matubag ang online nga sekswal nga pagpahimulos sa mga bata sa lokal nga lebel.

“We need more of this kind of investment in prevention and protection (Nagkinahanglan kita og dugang niini nga matang sa pagpamuhunan sa pagpugong ug pagpanalipod,” ingon pa ni Soco.

Ang pagtuon nanawagan alang sa dinalian nga aksyon aron mapalapdan ang mga balaod ug programa nga nanalipod sa mga bata. Girekomenda niini ang mas lig-on nga pagpatuman sa mga balaod sa pagpanalipod sa mga bata sa lokal nga lebel, mas maayong serbisyo sa suporta alang sa mga survivors, regular nga pagbansay alang sa mga fronline nga mga trabahante (mga social worker, pulis, ug mga opisyal sa barangay) kung unsaon pag-ila, pagtubag, ug pagreport sa online nga pag-abuso, ug dugang nga mga paningkamot sa pagpataas sa kahibalo sa publiko ug digital literacy.

Giawhag usab niini ang mga pribadong kompanya nga himuong mas luwas ang mga online platform pinaagi sa pagpamuhunan sa real-time nga pagmonitor sa materyales sa child sexual abuse, lig-on nga mga himan sa pagreport, ug mas suod nga kolaborasyon sa mga grupo sa pagpanalipod sa bata. (ECB/PIA7-Bohol)

Gipangunahan ni Second District Board Member ug nagsulat sa Anti-OSAEC nga ordinansa sa Bohol, Atty. Jiselle Rae Aumentado-Villamor ang simbolikong paglagda sa manifesto nga magpabiling aktibo, konektado, ug pasalig sa pagpabiling luwas sa mga bata online atol sa gipahigayong Research launch sa Safeguarding Young People from the Dark Path of Self-Facilitated Live-Streaming of Child Sexual Exploitation and Abuse (CSEA) niadtong Huwebes, Hulyo 24 sa Metro Center Hotel, dakbayan sa Tagbilaran. (ECB/PIA7-Bohol)