PhilHealth nipasalig sa coverage alang

sa kasagarang mga sakit sa ting-ulan

TAGBILARAN CITY, Bohol (PIA)--Samtang ang kaylap nga pagbaha tungod sa pagbunok sa ulan padayon nga nakaapekto sa daghang mga bahin sa nasud, ang Philippine Health Insurance Corporation (PhilHealth) nagpasalig sa publiko nga kini naglangkob sa pagpaospital tungod sa dengue ug leptospirosis, duha sa labing kasagarang mga kondisyon nga makaapekto sa mga Pilipino sa panahon sa ting-ulan.

Ang enhanced benefit packages sa PhilHealth anaa na sa P19,500 ug P47,000 alang sa kasarangan ug grabeng dengue, matag usa; samtang ang coverage sa leptospirosis gipauswag ngadto sa P21,450.

Ang ubang mga waterborne disease nga sakop sa PhilHealth naglakip sa Acute Gastroenteritis nga anaa na sa P11,700 ug Hepatitis A sa P23,010 kon ma-confine sa level 1 ngadto sa 3 nga mga tambalanan.

Kini nga mga pagpauswag nahisubay sa direktiba ni Presidente Ferdinand R. Marcos, Jr. nga himoong mga benepisyo sa pag-atiman sa panglawas dili lamang nga maabot sa usa, apan labaw sa tanan, tinuod nga mabati sa tanang Pilipino.

“Kung tinamaan ng dengue o leptospirosis sa kabila ng pag-iingat, magpunta na po kayo agad sa malapit na PhilHealth-accredited health facility para kayo ay magamot. Huwag na po kayong mag agam-agam dahil sagot ng PhilHealth ang malaking bahagi ng inyong gastos sa pagpapagamot,” pasalig ni PhilHealth Acting President ug CEO Dr. Edwin M. Mercado.

Gipahinumdoman usab sa PhilHealth ang publiko nga unahon ang personal nga kaluwasan panahon sa ting-ulan.

Aron malikayan ang mga sakit nga dala sa tubig ug malikayan ang impeksyon sa leptospirosis, hugot nga gitambagan ang publiko nga likayan ang pag-ubog o pagdula sa tubig baha, paghugas sa kamot sa dili pa mokaon ug pagkahuman mogamit sa banyo, ug pag-inom og limpyo nga tubig.

Kinahanglan usab nga masiguro nga ang pagkaon limpyo ug husto nga pagkaluto.

Aron malikayan ang dengue, tambag sa mga awtoridad nga limpyohan ang palibot ug mogamit og mosquito nets o insect repellent aron malikayan ang mga lamok nga nagdala og dengue. (ECB/PIA7-Bohol)

Kung mataptan og dengue, leptospirosis ug uban pang sakit nga dala sa panahon sa ting-ulan, gi-awhag sa PhilHealth ang publiko sa pag-adto dayon sa labing duol nga pasilidad sa panglawas nga accredited niini alang sa pagtambal. Ang PhilHealth mo-cover sa dakong bahin sa gasto sa pagpatambal. (PhilHealth)