‘Guarantee letter’ alang sa

hinabang, tun-an pa sa SP

TAGBILARAN CITY, Bohol (PIA)—A-tun-an pa karon sa Bohol ang paggamit na usab sa Guarantee Letter isip usa ka paagi sa paghatag og hinabang sa mga Bol-anon nga nagpakitabang kay anaa naipit sa kalisud.

Kini maoy gipaambit ni Provincial Social Welfare and Development Officer (PSWDO) Carmelita Tecson, nunot usab sa gipagawas nga Executive Order No 26 nga gilagdaan ni Gob Erico Aristotle Aumentado Julyo 2.

Gitawag nga Enhanced Policy alang sa Programa sa Assistance to Individuals in Crisis Situation (AICS), kini nagapamaayo sa pagpatuman sa hinabang isip social protection, social equity ug inclusive growth alang sa mga Bol-anon.

Ug kon adunay programa sa AICS sa nasudnong kagamhanan nga gipatuman sa Department of Social Welfare and Development (DSWD) ang sa lalawigan sa Bohol gipatuman sa PSWDO.

Usa ka pakete sa hinabang, ang AICS may pundo nga gitagana alang sa panginahanglan sa pagkaon, pangplete sa mga natanggong nga pagawas sa Bohol, tabang medical, tabang pagpalubong, tabang sa edukasyon ug tabang pagsuporta sa mga mas nanginahanglan.

Ang hinabang nagkantidad og P1 libo ngadto na sa P10 mil, bisan pa nga mahimong makakuha ang usa ka tawo nga naa sa ipit nga sitwasyon, sa P75 mil, ilabi na sa hospitalization.

Matud ni Tecson, kon ang kinahanglan, dili molapas sa P10 mil, mahimo ra kini nga makuha nga cash, apan kon molapas na sa P10 mil, kinahanglan na kini nga iproseso sama sa pagclaim sa tseke.

Ang tseke, manginahanglan og halos usa ka buwan nga pagproseso, mao nga kon panginahanglan sa medical, dili kaayo makatabang kay magsige man usab og dugang ang bayranan sa ospital.

Nunot niini, gisugyot nga sama sa DSWD, gamiton na ang guarantee letter nga magsilbi nga panaad sa goberno nga iyang bayaran ang nahibiling bayronon nga sobra sa P10 mil.

Hinuon, kini manginahanglan og pagtugot sa Sangguniang Panlalawigan, kya kini magtugot sa gobernador nga gamiton ang bag-ong sistema. (PIABohol)

KON ITUGOT. Inay magpaabut og us aka buwan aron makagawas ang tseke nga hinabang, ang pagpagawas sa guarantee letter magpadali sa proseso, ilabi na kon gikinahanglan na kayo ang tabang, matud ni Carmelita Tecson, OPSWD. (PIAbohol)