PBBM: Public school teachers makakuha na og

overtime, overload pay sugod karong school year

TAGBILARAN CITY, Bohol (PIA)--Ang mga magtutudlo sa pampublikong eskwelahan mabayran na alang sa ilang overload ug overtime work sugod karon nga school year, gipahibalo ni Presidente Ferdinand R. Marcos Jr. niadtong Lunes.

“At ngayong school year na ito, makakatanggap na kayo ng kabayaran para sa inyong teaching overload at para sa inyong overtime,” matud pa sa Presidente sa iyang ika-4 nga State of the Nation Address (SONA).

Gihatagan og gibug-aton sa Presidente nga ang mga magtutudlo mao ang labing mahinungdanon nga haligi sa sistema sa edukasyon, ug gipasaligan sila nga ang ilang nahimo dili lamang masukod sa gidaghanon sa mga estudyante nga ilang mapasar, apan kung unsa ka maayo ang ilang pag-amuma, paggiya, ug pagdasig sa mga estudyante nga magtinguha og mas taas sa kinabuhi.

“Asahan po ninyo na hindi gagawing sukatan ng galing o ng performance ninyo ang dami lamang ng estudyanteng inyong pinapasa. Kundi, ang dami ng mag-aaral na inyong pinapahusay at pinapataas ang ambisyon sa buhay,” pasalig pa sa Presidente.

Matud pa niini nga wala moundang ang gobyerno sa pagpangita og mga pamaagi aron mapagaan ang palas-onon matag-adlaw sa mga magtutudlo.

Gipasiugda usab ni Marcos ang mga paningkamot sa iyang administrasyon sa pagpataas sa propesyon sa pagtudlo, nagtimaan sa pagmugna og 60,000 ka dugang nga mga posisyon sa pagtudlo ug ang pagpahapsay sa mga kinahanglanon sa administratibo aron tugotan ang mga magtutudlo nga mas makatutok sa pagtudlo.

Ang Presidente miingon nga dul-an sa 100 ka non-teaching nga mga dokumento nga gikinahanglan kaniadto sa mga magtutudlo ang gikuha aron mogaan ang ilang trabaho.

Matud pa niini nga himuon na usab nga digital ang mga nahabilin pang papel nga kinahanglang asikasohon sa mga magtutudlo.

“Para pwede na ninyo itong gawin online-diretso na mula sa inyong mga bagong laptop!” pahayag pa sa Pangulo.

Sa kamandoan sa Presidente, ang Department of Education (DepEd) milihok sa pagpahapsay sa mga porma ug mga report sa eskwelahan, nga makapagaan sa administratibong palas-anon sa mga magtutudlo sa publikong tunghaan aron sila makatutok sa pagpalambo sa resulta sa pagkat-on sa mga estudyante. (ECB/PIA7-Bohol)

Sa iyang ika-4 nga SONA, mihatag og pasidungog si Presidente Ferdinand Marcos Jr. sa mga magtutudlo sa nasud. Ang Presidente midugang nga ang administrasyon dili gayud mohunong sa paghimo sa kinabuhi sa mga magtutudlo nga mas sayon samtang sila nagpadayon sa paghashas sa kahanas sa mga estudyante. (PIA)