PBBM nigahin og P1B aron itukod og 300K

ka mga barangay child dev’t, bulilit centers

TAGBILARAN CITY, Bohol (PIA)--Si Presidente Ferdinand R. Marcos Jr. nigahin og P1 bilyones alang sa pagtukod sa kapin sa 300,000 ka Barangay Child Development Centers ug Bulilit Centers sa tibuok nasod aron matubag ang dugay nang kakuwang sa daycare facilities.

Sa iyang ika-4 nga State of the Nation Address (SONA) nga gipahayag sa Batasang Pambansa niadtong Lunes, gipasiugda ni Presidente Marcos nga ang edukasyon nagpabiling nag-unang prayoridad ubos sa iyang administrasyon.

“Puspusan nating inaayos at pinapaganda ang ating sistema ng edukasyon. Sa lahat ng mga pinahahalagahan ng Administrasyon, ito pa rin ang nasa rurok,” matud pa sa Presidente.

“Naglaan tayo ng isang bilyon para makapagtayo ng mahigit tatlong daang Barangay Child Development Centers at Bulilit Centers sa buong bansa. At ang pinaka-priority ay ‘yung mga nangangailangan na pook na malalayo,” pahibalo pa sa Presidente.

Misaad usab ang Hepe Ehekutibo nga magtukod og 44,000 pa ka lawak-klasehanan sa dili pa matapos ang iyang termino ug nanawagan sa Kongreso nga suportahan ang maong paningkamot alang sa pagkat-on sa mga estudyante.

Dul-an sa 22,000 ka bag-ong classroom ang gibuksan sa miaging tulo ka tuig ubos sa administrasyong Marcos.

Gipasiugda usab sa Presidente ang ubang mga inisyatiba sa pagsuporta sa edukasyon, apil ang gipakusog nga pagpatuman sa Early Childhood Care and Development program aron masiguro ang holistic nga kalamboan sa kabataang Pilipino.

Gilusad usab sa gobyerno ang Academic Recovery and Accessible Learning (ARAL) nga programa karong tuiga nga nagtumong sa pagsiguro nga ang mga estudyante sa Kindergarten hangtod sa Grade 10 adunay gikinahanglan nga mga kahanas sa pundasyon aron makab-ot ang mga kahanas nga angay sa ilang lebel sa grado.

Mipasalig usab ang Hepe Ehekutibo nga magbutang og daghang magtatambag sa eskwelahan aron mapanalipdan ang kahimsog sa pangisip sa mga estudyante. (ECB/PIA7-Bohol)

Importante ang mental health sa mga batan-on sumala pa ni Presidente Ferdinand Marcos Jr., busa adunay plano nga dugangan pa ang mga school counselors aron mogiya sa mga tinun-an. Gawas pa niini, idugang usab ang "Bulilit Centers" sa tibuok nasud, ilabi na sa mga dapit nga nanginahanglan, isip tubag sa grabeng kakulangon sukad niadtong 1990. (PIA)