Gobyerno mogahin og P60B alang sa libreng

edukasyon sa kolehiyo, tech-voc programs sa 2026

TAGBILARAN CITY, Bohol (PIA)--Aron mapadayon ang taas nga edukasyon nga ma-access sa mga Pilipino, si Presidente Ferdinand R. Marcos Jr. mipahibalo niadtong Lunes nga mas daghang pamuhonan sa libre nga edukasyon sa kolehiyo sa publiko ug mga programa sa pagbansay sa technical-vocational (TechVoc).

Sa iyang ika-4 nga State of the Nation Address (SONA) sa Batasang Pambansa, si Marcos niingon nga dul-an sa P60 bilyones ang igahin alang sa libreng tuition sa minilyon ka mga tinun-an sa mga pampublikong kolehiyo ug mga programa sa TechVoc.

“Kung tutungtong naman sa kolehiyo, nakahanda ang malaking pondo para sa pagtutustos sa libreng pampublikong edukasyon sa kolehiyo. Pati na rin ang mga subsidy at financial assistance para sa mas higit pang nangangailangang estudyante,” matud pa sa Presidente.

“Sa susunod na taon, maglalaan pa rin tayo ng halos 60 bilyong piso para sa libreng edukasyon sa pampublikong kolehiyo at sa TechVoc,” dugang pa sa Presidente.

Sa pagkakaron, kapin sa duha ka milyon ka mga estudyante ang nakabenepisyo gikan sa libreng programa sa higher education sa gobyerno kada tuig.

Ubos sa administrasyon ni Presidente Marcos, dugang nga 260,000 ka mga batan-on ang nakakuha sa libre nga programa sa edukasyon sa kolehiyo, nagtabang sa daghang mga kabatan-onan nga matuman ang ilang mga damgo.

Si Presidente Marcos niingon nga hatagan og prayoridad sa gobyerno ang mga anak sa mga miyembro sa Pantawid Pamilyang Pilipino Program (4Ps) alang sa libreng mga programa sa kolehiyo ug TechVoc.

Gipasiugda usab sa Presidente ang nagkadaghang mga scholarship nga gihatag sa Technical Education and Skills Development Authority (TESDA).

Sa 2024 lamang, ang TESDA nakahatag og labaw sa 200,000 ka dugang nga mga scholarship, nga nakapahimo sa daghang mga Pilipino nga makakuha og mga kahanas ug pagbansay nga andam sa trabaho.

Gi-awhag sa Presidente ang mga ginikanan sa hingpit nga pagpahimulos niini nga mga oportunidad sa edukasyon, gipasiugda nga ang tumong sa gobyerno mao nga ang matag pamilyang Pilipino adunay labing menos usa ka miyembro nga nakatapos sa kolehiyo o nakatapos sa programa sa TESDA. (ECB/PIA7-Bohol)

Sa iyang ika-4 nga State of the Nation Address (SONA), gihatagan og gibug-aton ni Presidente Ferdinand R. Marcos Jr. ang paghatag og mga scholarship, partikular sa mga benepisyaryo sa sektor sa agrikultura. (PCO/PIA)