Komprehensibong pag-audit sa mga

flood control projects gimando ni PBBM

TAGBILARAN CITY, Bohol (PIA)--Si Presidente Ferdinand R. Marcos Jr. niadtong Lunes nihatag og hait nga pagkondenar sa korapsyon sa mga proyekto sa pagpugong sa baha, nga nagtawag sa kaylap nga kapakyasan sa pampublikong imprastraktura nga gituyo unta sa pagpanalipod sa mga komunidad gikan sa pagbaha.

Sa iyang ika-4 nga State of the Nation Address (SONA), gikondena ni Marcos ang grabe nga mga iregularidad sa mga proyekto sa pagpugong sa baha, nga nakatampo sa bag-o nga grabe nga pagbaha tungod sa habagat ug Bagyong "Crising," "Dante," ug "Emong."

Gimando sa Presidente ang usa ka komprehensibo nga pag-audit ug hingpit nga transparency sa mga proyekto sa pagpugong sa baha, ingon man ang legal nga aksyon batok sa mga mapamatud-ang nag-abuso sa pondo ug ilegal nga nakaganansya gikan sa maong mga proyekto.

“Kitang-kita ko na maraming proyekto para sa flood control ay palpak at gumuho at ’yung iba, guni-guni lamang,” matud pa sa Presidente.

Sa pagtawag sa sistematikong sayop nga paggamit sa mga pondo sa publiko, gibutyag ni Marcos kung giunsa ang mga trabaho sa publiko nahimo nga network sa "kickbacks, initiatives, errata, SOP, for the boys," nga mga termino nga nagtumong sa korap nga mga buhat.

Ang Hepe Ehekutibo nag-apelar og hustisya alang sa mga biktima sa baha ug sa umaabot nga mga henerasyon sa mga Pilipino nga mopas-an sa palas-anon sa pagbayad sa utang nga nahimo pinaagi sa korap nga mga buhat.

“Mahiya naman kayo sa mga kabahayan nating naanod o nalubog sa mga pagbaha. Mahiya naman kayo lalo sa mga anak natin na magmamana sa mga utang na ginawa ninyo, na binulsa n’yo lang ang pera,” ang Presidente miingon, nga nakadawat og standing ovation gikan sa mamiminaw sa House of Representatives.

Aron mapugngan ang dugang korapsyon, si Marcos mimando sa Department of Public Works and Highways (DPWH) sa pagsumite sa usa ka komprehensibo nga listahan sa tanang mga flood control projects sa miaging tulo ka tuig.

Ang listahan pagasusihon sa Regional Project Monitoring Committee nga mo-report sa mga napakyas, wala mahuman, ug giingong ghost projects diin ang listahan imantala alang sa kasayoran sa publiko. (ECB/PIA7-Bohol)

Sa iyang ika-4 nga State of the Nation Address (SONA) niadtong Lunes, si Presidente Ferdinand R. Marcos Jr. nipadayag sa iyang kaguol sa mga palpak ug wala mahuman nga mga proyekto sa pagsumpo sa baha. Busa iyang gimandoan ang DPWH nga mosumiter og listahan sa mga proyekto sa niaging tulo ka tuig. Ang Regional Project Monitoring Committee magrepaso niini aron mailhan ang wala pa nahuman, o “ghost projects,” ug ang listahan ipahibalo sa publiko. (PCO/PIA)