AICS mapangayo ka 1

Sa matag 6 ka buwan

TAGBILARAN CITY, Bohol (PIA)—Gawas lamang kon ang gipangayo nga para sa tambal gikan sa pundo sa kagamhanan, aron ipalit sa tambal sa maintenance sa mga chronic nga sakit, magkinahanglan pa og unom ka buwan ang us aka benepisaryo aron makapangayo og usab.

Kini maoy gipasabut ni Provincial Social Welfare and Development Officer Carmelita Tecson, kinsa nagpasabut sa tabang sa Bohol nga giila usab nga Assistance to Individuals in Crisis Situations (AICS).

Ang AICS, usa ka pakete sa hinabang alang sa mga kwalipekado nga benepisaryo , aron makasugakod sa temporaryong kalisud dala sa krisis.

Hinuon, prayoridad nini ang mga kabus, kadtong mga sector nga nabiyaan, mga naa sa informal sector ug kadtong nagsagubang og krisis dala sa katalagman, krisis sa ekonomiya ug aksidente.

Gawas nga ang nasudnong kagamhanan nagtanyag niini nga AICS pinaagi sa Department of Social Welfare and Development (DSWD), ang kagamhan sa Bohol may gitagana usab nga hinabang sama niini, dayag ni Tecson, didto sa Kapihan sa PIA.

Usa sa tabang nga nasulod sa pakete sa mga hinabang sa kagamhanan mao ang tabang Medikal nga naglangkob sa pagpa-ospital, hinabang sa tambal, bayad sa laboratory nga mga procedures, ug pangbayad sa doctor pinaagi sa professional fees.

Sa tabang nga makuha, gikan sa P1 ka libo ngadto sa P10 libo, pwede nga matabang kausa sa unom ka buwan lamang, matud ni Tecson.

Hinuon, kon ang pagpakitabang, tungod sa mga mas grabe nga sakit sama sa sakit sa kasingkasing, cancer, lupus, o kidney failure, mahimo nga makapangayo kausa sa tulo ka buwan, dugang niya.

Gawas sa medcial assistance, aduna usay food assistance alang sa mga indibidwal ug sakop sa banay, transportation assistance para sa mga mobyahe pagawas sa Bohol ug nahutdag kwarta, hinabang pagpalubong, educational assistance ug supportive assistance. (PIABohol)

KA USA SA 6 BUWAN. Kasagaran sa mga hinabang nga makuha gikan sa AICS, mapangayo lamang ka usa sa 6 ka buwan, gawas sa hinabang alang sa mga grabe na nga sakit, ug sa sitwasyon subay sa rekomendasyon sa social workers, pasabut ni Carmelita Tecson, PSWDO, ug ni Hanna Bullecer, didto sa Kapihan sa PIA.